憑特效與虛擬實境建立數字王國

朋友常講笑話我可能會唔記得四個孫嘅名，但係如果每個小朋友畀一個編號佢我就一定記得。事實上金融事業就係數字人生，而我從來都覺得數字比人情世事更簡單。從事電腦和數碼行業嘅人更加係由最簡單嘅0和1二進位演變出今日嘅智能世界。

兩年前我在呢個欄訪問過數字王國（0547）行政總裁謝安，非常佩服呢位年輕人勇闖荷里活嘅經歷。最近我認識咗公司嘅首席投資總監朱希（Jimmy），一睇佢嘅年齡背景與謝安非常相似，原來佢哋相識於大學時代，一同於北京畢業，之後分別加入不同嘅投行，無獨有偶經常在併購活動上碰頭，不過係對家。朱希話對咗幾次家之後，謝安向佢招手，請佢加盟。現時年輕管理人員手持公司約一成股權，加倍投入。

上次訪問都有提過數字王國（Digital Domain）由占士金馬倫（James Cameron）創辦，已經有二十五年歷史，到佢哋已經係第九代管理人，亦係管理公司最長時間嘅管理層，並且一手將公司帶出北美，在溫哥華和中國設立公司和製作基地。Digital Domain現時仍然係荷里活主要特效公司之一，亦係唯一由華人管理嘅公司，二○一七年參與咗《美女與野獸》、《蜘蛛俠：強勢回歸》、《雷神3》等電影嘅特效工作。

公司在中國建立特效團隊之後，已經將成本降低好多，不過今時今日中國嘅成本都已經太貴，接荷里活工作賺少咗錢。所以公司又在二○一七年喺印度海德拉巴（Hyderabad）開設特效公司，現時已經有二、三百人，期望可擴充到九百人，屆時可大大降低成本。三地成本到底點比較？朱希比喻，一個美國特效師嘅人工可以請五個印度特效師，一個中國人就可以請三個印度人。

除咗開拓印度製作基地，數字王國又在電影之外開拓電視劇嘅特效工作。公司採用嘅模式係先投資入「劇花」，咁風險會否好高？朱希解釋，佢哋有三重保障，第一係同對方簽訂保底兼利潤分成協議；第二劇集一定要預售加快資金回籠；第三係整個特效工作都要交畀數字王國，最壞打算劇集唔收得都收回成本及有特效收入。

數字王國經營特效業務多年，一個好大嘅資產係擁有一個龐大數據庫，包羅以前做過嘅特效，淨係樹都有幾十萬棵，隨時可以用喺電影劇集製作。朱希引用謝安名言講笑話，點解荷里活電影成日都炸白宮？原來係因為平，因為之前已經做落！

朱希分析，特效係數字王國嘅「傳統」業務，係養起公司嘅麵包，至於牛油，就係虛擬實境（VR）業務。聽見VR，我諗住會唔啱我呢啲長者，但係聽落依家新一代嘅旋轉座椅（Motion Chair）和頭戴裝置令人有走入實境感覺之餘，又唔會睇到頭暈。除咗內容，公司由二○一七年九月開始建立VR戲院，並引入保利資本及弘毅資本投資，現時已經簽約超過200間，開業8間，今年會增加至150個點，包括保利影院、中信書店、機場、博物館、主題公園，甚至在連鎖快餐店建點。三月份會在深圳開VR戲院，等我到時去試試。