後匯有期

二○一七年接近尾聲，我唔係同大家講後會有期，而係同老友新城晉峰金融集團嘅文錦輝一齊一期一匯。

美國聯儲局最新利率點陣圖顯示明年會加息三次，但輝哥覺得呢個估計比較保守，佢嘅睇法係會加四次。美國咁多年量寬通脹都未出現，如果央行縮表，通脹就有可能現身，咁聯儲局都要焗住加息以控制通脹，所以到明年年底有機會加多一次息。

另一方面，美國通過稅改方案，有分析報告指美國企業將由海外調回約2,500億美元利潤，呢筆龐大資金返美，一係用來買美股，一係派息，兩者都對股價有支持。特朗普仲有一招萬億基建，呢個計劃對全球資金流向都有影響，估計大部分商品都會再有一波升浪。

事實上，美國經濟蓬勃，我同意輝哥講唔好貿貿然睇淡美元，短期震盪少不免，但最少第一、二季都睇好。我覺得不應睇淡美元之餘，更不應睇淡美股。今年美股勢頭好好，輝哥話齋做呢行咁耐好少見到升足12個月，頭也不回，唔係講笑，可以睇淡，但唔好做淡。

美元強，其他非美貨幣係咪無運行？輝哥建議應該揸英鎊沽歐元，因為脫鉤長期對英國有利，而歐洲經濟雖然不錯，但歐央行總裁德拉吉繼續實行寬鬆貨幣政策，歐洲同美國息差可能會在明年上半年拉闊。反觀英國經濟好通脹亦高，所以比較有條件加息，同美國息差唔會拉咁闊。

日本經濟在2017年下半年已慢慢向好。聖誕前後日本會議息，另外市傳日本明年會減少發債，呢點好重要，因為日本債大部分都係日央行買嘅，減少發債即係央行曲線收水，會支持日圓走強。如果明年初見到日本經濟勢頭好，加上有迹象減發債，日股會稍弱，而日圓就可以睇高一線。點解美元又睇好，日圓又睇好？要留意，美元係長遠睇好，日圓係因為經濟反彈，另外有利差交易拆倉，因而有一波升浪。最後，雖然萬億基建落實，但係輝哥睇淡商品貨幣，尤其是加元。

由於內地實行供給側改革，去產能，所以2017年下半年商品期貨已經做好。而去產能更加扭曲咗某些行業嘅供應，萬一大型基建上馬，要起動返礦場同生產線要較長時間，基建帶動嘅需求一上，商品價格會升。不過，萬億基建由講到落實可能要到明年第二、三季，因此基本金屬板塊下半年可以留意。

而上半年就睇實個油市，近期油價上上落落都唔係實質需求帶動，而係油組減產或輸油管道問題嘅短期刺激。目前環球原油庫存仍在高位，而電動車同混能車又不斷搶佔石油市場，因此明年最闊睇50-65美元之間，實際好難突破60美元。

輝哥同我在商台《人生交叉盤》內仲傾埋金銀債券，不過篇幅所限，講住外匯期貨先。其實今年最大升幅嘅係比特幣（Bitcoin），但係我真係唔識亦唔敢畀意見喇！2018年再見。