崔建邦分手即扮靚

今年三十八歲嘅崔建邦（Amigo）同年輕十年嘅林珊珊細女「野人」李怡撻着，女方任職能量治療師，又係瑜伽導師，拍拖時唔介意同Amigo一齊捱，早排仲傳佢哋會結婚。點知峰迴路轉，結婚忽然變分手，兩人先後公告已和平分手，大家再見亦是朋友。

日前，東姑就喺尖東見到剛回復單身嘅Amigo，同埋女助手去到免稅店嘅化妝品部門，原以為佢係幫吓眼陪女助手挑選，點知睇真啲，應該係調番轉頭，其實係助手幫佢揀粉底，見佢左揀右揀，後來仲要售貨員幫佢搽埋上面試色，精挑細選先揀啱一盒粉底埋單走人。

男人老狗咁姿整化妝扮靚，可能因為Amigo受到失戀刺激，既然回復單身再度上市，梗係要扮靚仔啲先媾到女，搵段新戀情彌補，先係治療舊情傷嘅最佳靈藥。至於，「野人」除咗勤做瑜伽，早幾日又去咗大埔嘅慈山寺做義工，尋求心靈嘅自在，撫平失戀嘅傷痛。

佢同女助手去選化妝品，兩人不停細細聲研究，相當挑剔。

Amigo最終要勞煩化妝品牌Sales姐姐推介粉底，仲試搽埋上面，試到啱先買。

佢千挑萬選，買咗盒粉底走人；始終感情未有新着落，更加要注重個靚樣。

同Amigo甩咗拖，「野人」藉練瑜伽及做義工，平復失戀嘅心情。