六十二歲的導演張堅庭，與英皇娛樂老闆楊受成的長女楊諾思，結婚至今廿四年，育有的三名子女各有所成，是圈中的一對模範夫妻。

不過，幸福非必然，二人昔日亦經歷不少風浪；日前，張堅庭夫婦在音樂佈道會上做見證嘉賓，席間竟大爆早年信主前，與太太常起爭執，不但自殘，更一度激動得企圖要從廿一樓跳樓自殺，他現回想起來仍猶有餘悸。

日前晚上，張堅庭和太太楊諾思到教會做見證，張堅庭大爆昔日夫妻關係麻麻，成日有爭拗，搞到他一度想跳樓輕生。

成日嗌交

日前晚上，張堅庭偕太太楊諾思現身九龍城一間教會，為音樂佈道會作見證嘉賓，場內約有百名教友。平時斯斯文文的張堅庭，當日大爆的竟是自己昔日曾試過自殘及企圖跳樓自殺，聽得在場人士目瞪口呆。

現場所見，張堅庭平心靜氣地憶述：「我哋結婚嗰時，我人又蠢，講晒所有嘢畀我太太聽，佢好叻喎，佢仲好記性過啲編劇，分段咁講出嚟。舉個好好嘅例子，以前我有個空姐女友，咁我話畀佢聽係咩航空公司，每一次搭航空公司，佢一入閘口，佢就開始話：『你今日會唔會撞到佢？你會唔會見到佢？你有冇見過佢？』」

他續說：「坐飛機就好似去咗間鬼屋咁，撞到佢真係喺度時咪死，我哋嗰時成日都嗌交，都好激烈。」楊諾思緊接補充：「我掟過花樽啦，你又將個遙控掟落去牆度，自殘啦，最嚴重嗰次就係跳樓啦。」

夫妻關係不易為，加上當時張堅庭正值事業低潮，又患有情緒病，壓力大到要爆煲，幸從宗教找到救贖。

危坐騎樓

回想起不堪往事，張堅庭淡淡然道：「咁佢成日都提，冇計喎。你只係以死明志，我嗰時半個身騎咗出去騎樓，嗰時我哋住二十一樓，地下仲有幾層，我嗰時騎咗出去之後，左右手都勒得好實……」

仍猶有餘悸的他，愈講愈肉緊：「腳箝到實，但係佢（楊諾思）又驚喇，佢想衝埋嚟，拉我落嚟，但係佢衝埋嚟時，我又好驚佢撞到我，最後……我都攞番條命。」雖然死過翻生，但他指當時正值人生低處，除了夫妻間的爭拗，事業走下坡，又患上了驚恐症，於是在○二年七月，他決定信主，求神打救，生命路上才扭轉危機。

其後，楊諾思分享夫婦相處之道，並引用了聖經金句勉勵教友，減少隔夜仇：「如果大家都嗌交，小小摩擦嘅時候，咁我哋會講：『不要含怒到日落』，解決咗先，不要再嬲啦大家。」

張堅庭和楊諾思向來是圈中的模範夫妻，不時有影皆雙出席活動，原來恩愛背後都經歷不少風浪。