跑得快　好世界

近年愈嚟愈多人愛上跑步，早上見到有人跑，晚上亦見到有人跑，有單獨聽着音樂跑嘅，亦有小組一齊跑嘅，印象中覺得全城街馬（Run Our City）廣為人知，好似係始於2014年AXA安盛嘅香港街馬10公里＠九龍東。香港今年跑步盛事一浪接一浪，嚟近9月就有一班超級英雄現身Marvel 10K Weekend帶領賽事，同月又有可以做善事嘅Barbie Run，首個結合跑步同瑜伽嘅大型運動亦會係9月舉行，緊接嘅10月仲有好多人嘅童年回憶，一次過見到7個超人現真身Ultraman Run，唔係粉絲嘅都可能想湊下熱鬧。

原本11月舉行嘅啤酒跑活動，邊飲啤酒邊跑街，但衞生署認為運動時唔應該飲酒，因為有機會導致脫水、影響中樞神經系統，仲更會影響反應協調、準確性同平衡，容易出現損傷、意外、中暑等情況，於是主辦單位早前決定取消，取而代之會喺十月舉辦萬聖節街跑，聽到個名又覺得幾得意，雖然我淨係鍾意游水呢個運動。

講得出話係街馬，就當然想鼓勵市民沿着熟識嘅街道上跑步，參與跑街嘅對象老、中、青三代都有，佢哋嚟自各階層但又係志同道合喜歡跑步嘅。雖然大家唔同年齡唔同階層，但總覺得佢哋都有着一份相同嘅熱誠，沿途跑街不但可以重新認識自己嘅社區，而且街馬主題據講每年都唔同，但目的不變、都係想提高港人對本地慈善團體、非牟利機構、以至社企嘅認識，關注香港弱勢社群日常要面對生活嘅問題，透過地區活動、同地區上非牟利機構合作，希望幫助改善少眾們生活嘅需要，將許多不可能變成可能、達致社會共融，繼而期望減少社會對少眾嘅歧視同偏見。

都市人生活咁忙，莫講話朋友平常未必常見，當中又有幾多人會真係放慢腳步，駐足欣賞身邊周圍嘅環境，間中聽到朋友會投訴工作緊張，日忙夜忙為生活而活，好多時錯過家人、朋友間發生咗嘅零碎小事，更何況係我哋住緊嘅社區，原來已靜悄悄在不知不覺間轉變咗，好彩依家有幾粒乖孫提醒我要放慢腳步、放多啲時間給家人。

朋友話跑步除咗強身健體外，鍾意跑步嘅人通常生活有一定規律，大多數會注意身體健康，日常亦多會留意飲食均衡，跑者通常對自己都有啲啲要求，唔會輕言就話放棄，做起事嚟嗰份決心同毅力，可能比唔鍾意做運動嘅人多啲。我覺得喜歡做運動，無論跑步又好、行山亦好，總之揾一樣適合自己嘅，可以揾到一個肯陪你行山，又肯陪你跑步嘅另一半先係最重要，哈哈。