睡眠質素好身體好

美國密西根州奧克蘭大學工程學教授芭芭拉．奧克莉（Barbara Oakley, Professor of Engineering at Oakland University in Rochester, Michigan, USA）提出，假定大腦係一台彈珠機（pinball machine），彈珠代表我哋嘅思路，如果彈珠彈出去碰到鐵釘間緊密嘅設計，彈珠彈跳路徑多半就只有幾種，但如碰到鐵釘間比較疏鬆嘅設計，彈珠路徑反而彈跳得較遠較多變。當大腦專注做一件事嘅時候，我哋就好似處於鐵釘間比較緊湊嘅設計模式，就好似我哋睇學術書、解數學題，大腦係處於專注呢個模式下，思路多半只有幾種；當大腦處於放鬆狀態嘅時候，我哋就好似處於鐵釘間比較疏鬆嘅設計模式，就好似我哋早上沖澡、坐喺巴士內睇窗外、散步、瞓覺咁嘅狀態，大腦係處於放鬆呢個模式下，思路就自然變得較有創意。

美國河濱加州大學心理學教授Sara Cednick為首嘅一個研究發現，睡眠過程中自主神經系統會肩負控制不自覺指導嘅身體機能，好似呼吸、心跳和消化等過程，人喺睡眠期間自主神經系統（ANS）活動增加與記憶改善有關。二十世紀八十年代末由Francesco Cirillo開發嘅番茄技巧（Pomodoro Technique）理論，GTD（Getting Things Done）係將一個待完成嘅任務，利用番茄定時器技巧地先做二十五分鐘唔准停嘅工作節奏，跟着有5分鐘休息時間，呢個工作模式據講除咗可以提升效率，更令我哋心理上加添成就感，人應該立即會覺得開心啲嘅，咁做起嘢嚟就自然快手快腳。

有科研更進一步指出有午睡習慣嘅人相比無小睡過嘅，喺回答帶有創作成分問題嘅時候，有小睡片刻過嘅實驗對象對答往往會更靈活，重要嘅係由於小睡令我哋大腦思考能力會提高約百分之四十，人類將來或者可以喺瞓覺時學習新嘅專業知識。可惜有法國科學團隊證實，我哋闔眼瞓覺時，大腦暫時只可以喺既定嘅模式下學習。我當然唔係叫你喺辦公時間內睡午覺，只係提議你可以參考番茄技巧理論去作息，效果可能事半功倍都未定。

有神經科學專家發現人就算喺休息狀態時，喺預設模式情況下，大腦仍然活耀，而且腦內特定唔同區域間，其實都有着交互作用，腦袋需要喺兩種模式間轉換學習，對於促進大腦記憶，鞏固學習過程發揮一定作用，效果亦最佳。所以老婆叫我早睡早起身體好，朋友亦提醒話最好睡眠作息時間係晚上十一點至凌晨四點，可惜我唔可以日日都做到，為咗身體好大家不妨考慮早睡早起呢個習慣，哈哈。