旅遊業重新出發

全球經濟走出疫情陰霾，旅遊業亦終於由谷底回升。世界旅行和旅遊理事會（WTTC）預計，今年全球旅遊業將近回復至疫情前水平，市場規模將恢復至九點五萬億美元，明年復甦勢頭將持續向好。香港人出名鍾情旅行，喺剛剛過去嘅五一長假為疫後首個黃金周，根據入境處統計，累計五日出境港人高達九十萬人次。

美麗華旅遊總經理李振庭（右）。

旅遊體驗平台Klook今年三月調查發現，近九成港人計劃在今年出遊，當中逾三成人更計劃旅行最少兩至四次，早前就同美麗華旅遊總經理李振庭（Alex）傾下疫後發展新趨勢。今年初本地多項檢疫措施大鬆綁，出入境限制亦逐步放寬，Alex透露，單計今年一月歐洲團已出咗五十二個，隨住航班數量陸續回升，預計暑假旺季將迎來高峰期。
開團依靠大量機位和酒店牀位，雖然港人外遊意欲大增，但全球旅遊業仍需時恢復人手和航班。上月櫻花季，日本來回機票高達過萬蚊一位，當地機場人龍仍逼爆入境大堂，有旅客等足五個鐘先完成過關手續。Alex指，機位供不應求之下，部分團費確實比以前貴，但港人「餓」咗三年，旅行預算明顯比昔日豪爽。至於航班不足問題，佢反而無太大憂慮，事關唔少國家為求促進當地旅遊經濟，指定航空公司必須定期復航，否則會失去航權，故預計下半年航班配額將逐步提高，票價或有機會回落。
以往港人去旅行都集中吃喝玩樂，務求食到盡、玩到盡。踏入後疫情時代，美麗華有見大眾更重視身心健康，特設以大自然為主題嘅旅行團，例如同瑞士國家旅遊局合作推出環保瑞士遊，入住當局認可嘅環保酒店；又以單車遊、健步行形式遊覽環保小鎮；亦安排體驗湖邊野餐等，就連航機都要選用可持續航空燃料，從衣食住行實踐綠色旅遊。
回顧過去各地封城鎖國嘅日子，旅遊業長期處於懸崖邊，香港旅遊業議會上年統計，疫情期間有三百幾間旅行社結業，逾二百員工嘅大型旅行社則削至四間。能夠喺業界支撐至今，除咗考驗財力，更要靈活變陣。美麗華旅遊作為恒基旗下子公司，財力毋庸置疑，而為開拓本地客源，公司夥拍美麗華酒店推出Staycation，並同各國旅遊局合作，提供異國風情嘅住宿體驗，幫港客止下旅行癮，亦能帶動收入。
業界因疫情停擺三年，人手荒無疑係旅遊業復甦嘅最大障礙，甚至出現有客無人接、有房無人執、有車無人揸、有團無人帶嘅困局。Alex憶述喺疫情期間，唔少從業員轉行至政府或醫護業，由於發展前景穩定，故有少部分人無打算回流「老本行」。佢寄望隨住旅遊需求激增，導遊可出團到唔同旅遊點，從而吸引從業員重新出發。