袁澧林畀經理人告
模特兒出身嘅袁澧林(Angela),成為ViuTV開台力捧嘅「女神」,呢期佢就密密幫該台拍緊新劇《瑪嘉烈與大衛系列:前度》,劇中仲擔正做「女一」。
日前,東姑就喺大學站,見到佢為部劇開工。被喻得為「文青女神」,舉手投足梗係又pure又true啦,點知劇組真係大整蠱,大熱天時拍冬天戲,戲服係件長袖衫,仲要烈日當空戶外取景。可憐Angela想pure都冇得pure,未埋位前「私縮」埋簷篷底遮陰;埋位後熱到唔只出汗,連鼻水都「標」埋出嚟,見佢揸住紙巾猛做「鼻涕蟲」,兼黑晒口面添。
黑面可能仲因為Angela畀經理人公司「種星堂」入稟,指控佢擅自接洽工作,違反合約,所以要求法庭禁止佢,進行非由經理人公司安排嘅工作,並且仲要交出其他工作獲得嘅收入。睇嚟Angela今次真係有排煩!
Angela熱到流晒鼻水,猛喺度「包雲吞」,可憐大家見佢呢個樣,真係乜胃口都冇晒。
大熱天時三十幾度,着住件長袖衫拍冬天戲,難怪Angela都熱到黑晒口面、扁晒嘴。
未埋位前,Angela即刻匿入簷篷底下遮陰唞涼,熱到妝都溶埋,要由化妝師幫佢補番啲粉。