廿三歲的袁澧林說起她在新片《那一年，我17》中，跟男主角彭永琛那場錫面珠登的戲時，一臉羞澀，笑得相當靦腆，猶如情竇初開的少女，在說着自己心儀的白馬王子。

「嗰場戲拍嘅時候，差唔多煞科，我同彭永琛因為個角色，一齊經歷咗好多嘢，到最後……錫咗……哈哈！」說罷，她顯得更不知所措。在稍有些姿色的女生或女藝人，個個只顧在社交網把自己照片（或自拍照片）以P圖和美圖秀秀，刻意地美化自己的當下，她這種純出於自然、不造作的表現，確是一道清泉，實在珍貴，難怪大家都封她做「文青女神」。

「大家封我呢個朵嘅時候，都未算好認識我，只係睇到我啲相，覺得有嗰股氣息。其實我覺得自己未去到『女神』咁勁嘅，相比起我啲偶像王菲、Cate Blanchatt、Emma Watson同Natalie Portman，我真係唔掂呀！同埋『文青』，suppose係講啲對文學、歷史又或者係文化、生活好有研究嘅人，但o依家大家都只係講着得『好文青』，變咗個形象。」

但論到外界形容她有仙氣，她又再很大反應地面紅紅、騰晒雞。「吓……多謝！哈哈哈哈！」這刻的她，又pure又true到呢。

 

在《那一年，我17》中，袁澧林與身旁的彭永琛首次當上電影男女主角。「我同佢，同埋阿King（C AllStar的吳崇銘）、Kyle（李任燊）因為呢套戲，建立咗好好嘅友誼。」

在《那》片中，她有不少彈結他演出。「監製就係知我識彈琴同結他，所以先搵我casting呢個角色，點知無啦啦就中咗。」

鄉下妹

袁澧林的純和真，她說是來自成長的沙頭角。「我住咗喺沙頭角十幾廿年，先搬去粉嶺，所以我個人超純樸同好簡單，簡直係個鄉下妹，哈哈哈！」問她小時候是否「屋邨妹」，她很猶疑：「『屋邨妹』即係乜嘢呀？」還以為她介意這個提問，誰料她自己碎碎唸起來：「屋邨、村屋、屋邨、村屋……呀！係呀！我係『屋邨妹』嚟o架！哈哈哈！」

她上有一個年長一歲的家姐，下有一個細自己八年的妹妹。「我排中間，係最不受拘束、最難管教同最曳嘅一個。」所謂「最難管教」，實情也不是完全當父母的話是耳邊風，至少，她也順從他們的意願，考進了浸會大學，修讀會計系。「我屋企人對我嘅期望係：『阿女，第一、你要讀大學；第二、要搵錢！』佢哋啲諗法比較傳統，覺得商科係搵到錢、做生意嘅，所以我一路都係讀商科，入浸大修讀會計，都係屋企人想；但其實會計唔係好適合我，我唔係個好detail-minded嘅人，自己啲嘢都亂七八糟，好冇生意頭腦，要我做生意，死梗！哈哈哈！」

話雖如此，她還是努力完成整個課程。「take埋七月嘅summer semester，我就畢業啦！Yeah！」

 

於港鐵站內看到放大了的自己，袁澧林只覺眼袋超大，更親自上前為照片「執走」眼袋，勁搞鬼。

小時候的袁澧林，手長腳長，零添加的五官已很精緻，樣貌跟現時相差不太遠。