因為九三年一套《八仙飯店之人肉叉燒包》，人們都稱五十六歲的導演邱禮濤是「cult片之王」。

這天，他穿着美國重金屬樂隊Marilyn Manson的Tee、全黑打扮到來接受訪問，宣傳的並非《失眠》，而是同樣由他執導、蔡卓妍和周柏豪主演的《原諒他77次》。

電影題材是令外界有點愕然的愛情小品，照理結婚廿多載、女兒已屆廿四歲的他，應會趁機談談愛情觀，寄語後生仔女戀愛相處之道，但他卻以不屑的語氣說：「真係有啲人日日只係得情情愛愛，喺佢哋嘅世界，呢啲嘢就係全部！o依家特首係邊個，都可以唔知，仲以為係董建華o架！」

聽着他這番話，加上他的外形，以為他是個憤世嫉俗的老粗嗎？實情他八四年畢業於浸會學院傳理系，一五年更成為了嶺南大學文化研究哲學博士，是個真正有學識的文青，可以跟你侃侃而談八十年代知識分子的生活日常。「鄧小宇（鄧梓峰胞兄及七六年《號外》創辦人之一）買書，係一層層咁掃o架！佢嗰陣成日都去（民間學者）馬國明開嗰間曙光書店，嗰度專賣好多外國新思潮、哲學理論書，即係Foucault（法國哲學家）嗰啲，好快、好摩登！」

提到他想拍的電影題材，他又可以跟你由一九四一年的香港保衛戰說起，講到三年零八個月，再講到香港五十年代去。「淨係關於香港，都有咁多故仔，你話係咪可以拍到死都拍唔晒呀？」

所以話，與其說邱禮濤很cult，查實他亦很溝——註解是：多元化、乜都識又乜都得，更重要是，層次相當高。

 

向來拍戲着重真實感的邱禮濤，在《原諒他》中，拍出了很多情侶相處時的現實情境，例如去旅行時總會鬧交。「拍愛情電影，都係想得到觀眾嘅共鳴啫。」

原諒叉燒包77次

說邱禮濤是香港少有的多元化導演並不為過，單是這數個月，他執導上映的《拆彈專家》、《失眠》和《原諒他77次》，已經是三個不同的戲種。「有乜問題呢？唔同戲種，幾好呀！唔使拍死一種咁悶！咁先好玩嘛！有啲人淨係拍死一種，我真係戥佢哋難過！我真係唔得！」

當導演三十年，他形容，可以由當年賣血腥暴力的《人肉叉燒包》，至現在拍到sell靚仔靚女的愛情片《原諒他》，過程不是容易的。「嗰陣《叉燒包》一掂，個個都叫我拍呢啲戲，但我就係死都唔拍、死都唔拍！今日先至有得拍《原諒他》同《拆彈專家》，背後其實係有好多堅持同犧牲o架。

「人，係應該要有好多可能性o架嘛，即係秋生拍完《叉燒包》之後，套套戲都要搵佢做變態殺手，但佢唔係一定要做變態o架；正如李修賢做賊，都會好睇o架；鄭中基都唔一定搞笑，可以做正劇（正經劇種）o架，你睇佢拍《老港正傳》做得幾好！」

有指《失眠》中遭秋生切下體的日本演員船木一輝，因這一幕戲後，宣布退出演藝界。「據我了解唔關呢場戲事。一個日本演員，要喺中國發展，大陸咁多抗日神劇，人哋可以畀乜嘢角色你做呢？我明佢係會好尷尬！」

拍投資近二億的《拆彈專家》，邱禮濤為求真實，搭建了一比一的紅隧拍攝。「搭建之前，我哋做咗好多資料搜集，所有位都好細致，同真嘅好接近！」