鄧兆尊身為已故粵劇名伶新馬師曾（鄧永祥）的長子，四兄弟姊妹跟親母祥嫂（洪金梅），由爭產掀起的糾纏至今已二十年。早前祥嫂才於魯芬的喪禮聲淚俱下責子，轉頭又忽然拍片公開立了平安紙，透露遺產分配，四個兒女都有得分。

兆尊不以為然說：「冇所謂啦！好仔不論爺田地。」弔詭的回應，難道自命清高？「我不嬲都係中立嗰個，係調停人。佢哋有脾氣，我就冇脾氣，問題嘅癥結係兩邊對立，佢哋鍾意好嗰陣，我會盡量配合；有拗撬時，我就畀大家冷靜吓先。」

近年淡出幕前的他，每次見報除了因為與母親的轇轕，還因為他一拖三女友，「一王三后」令他被指御女有術，堪稱「男人之光」！

「呢啲嘢唔係我叻，係意外造成，好多嘢唔係你諗嘅……」說時一臉無奈，差在沒有真正說出口「齊人之福不易享」，語氣中隱含有苦自知的淡淡哀愁。男人對他既羨慕又妒忌，他冷哼兩吓似感慨萬千，並形容自己似「工人」：「我係任使嘅男人，屬於比較萬能嗰種，總之佢哋噏得出，我差唔多都做到咁滯啦！」

無論是母子之間、兄弟姊妹之間，或是三女侍一夫的關係當中，永遠將自己定位在最卑微的位置——擅於隱藏實力，以柔制剛，然後立於不敗之地，這種男人叫「鄧兆尊」。

 

祥哥教落

以柔制剛，鄧兆尊父親新馬師曾（祥哥）是表表者，他形容父親在生時，是家中被害一羣的首領，教幾兄弟姊妹，如何抗衡霸氣媽咪。「佢真係一個高人，有次媽咪同佢鬧交，剪爛晒佢嘅西裝，佢一啲脾氣都冇發，仲話：『多謝呀媽咪，以後唐裝有位放囉！』搞到媽咪仲頂住道氣！」原來，凡事不一定要硬碰硬，發脾氣篤人死穴，只會將事情惡化。

慈父教子方法亦如是，從來不嚴厲打壓，故意欲擒先縱，「舉例去夜總會，佢會慫恿你去、介紹埋你去大富豪，原來佢已經安排朋友暗中睇住你。佢知道後生仔經濟能力唔高，不如去一次見吓世面，等你知道了解咗，自然就收心養性，唔會再有遐想！」

自九七年祥哥過身後，四兄弟姊妹跟祥嫂，因爭產風波而關係破裂，二十年了，他和弟妹也沒有盡力修補母子關係，難免惹人閒言「不孝」。「何謂不孝呢？好多時你想去關心人，人哋想唔想你去關心先？做多餘嘢，反而有反效果。如果人哋真係有需要，會開口同你講。」他沒好氣地解釋。

九二年，父母正式結婚，婚禮由無綫播出，兆尊幾兄弟姊妹與祥嫂當時關係未轉差，外表看來感情融洽。

好心壞事

回憶起那些年的母子情，兆尊到加拿大讀書，家人不清楚當地物價，給了他有限的生活費，於是，他與其他窮學生合租單位，板間房內簡陋到只得一張牀褥、一張書枱，「有次阿媽嚟探我，一推開門即喊住話：『你點可以住呢啲地方o架？』

「我嗰陣時仲揸架『錢七』去接佢，佢又話：『乜嘢車嚟o架？呢架乜嘢怪物呀？』跟住佢就買咗部車畀我，又買咗間四千幾呎嘅屋畀我一個人住，抹都抹死，所謂嘅關心，但係害咗我！」

諸如兆尊後來加入娛樂圈，祥嫂亦過分保護。「我啱啱入行，任何有輕微危險嘅嘢，祥嫂都唔畀我做，返去同佢反映：『咁落去啲人唔會畀嘢我做，因為啲人驚整傷我。』

「一講完，啲人覺得以前保護你係錯咗喇，於是乜鬼都畀晒你做：爆炸、跳海、跳樓全部都有！有次拍場墮樓戲，要喺十樓墮落去，重複又重複咁拍，我被外牆刮到損晒，全身血，卒之我要請喺TVB十八年嚟嘅唯一一日病假。」

祥嫂當年力推愛子兆尊加入娛樂圈，但凡事不會跟子女有商有量，有時好心反而成壞事。