這六年來，一講飛簷走壁，一定想起關禮傑。
「哦~~《叛逃》（一四年劇集）吖嘛！其實可以成為被談論嘅話題，對我嚟講都係好事嚟嘅。」
劇中他演繹「世紀式跳樓」，一幕空中飛人，即使六年過去，現在播映的已是《機場特警》，但那個Cap圖，仍令人記憶猶新。「演戲，睇起上嚟好簡單，實際上好難，好似我藝訓班老師講，演戲只係兩個字：『生活』，而呢兩個字，其實好有深度。以前就話咩都要去試，不停咁接戲，o依家呢啲留番俾年輕人做啦！我唔會咁拼命，唔使攞獎o架嘞！」
從演三十九年，五十八歲的關禮傑，人生並不如戲那麼戲劇性，跟太太由拍拖到結婚，已走過接近三十七個年頭，二人的兩名女兒，也長得亭亭玉立，一家四口屬圈中的高顏值模範組合。「我覺得戀愛應該係咁樣，香港都好多老夫老妻嘅！我好傳統，家庭對我嚟講一向都係最重要嘅，以前做嘢要奮鬥，損失咗好多陪屋企人嘅時間，o依家啲女大咗都仲肯同我哋去旅行，好值得感恩o架嘞！」
關禮傑從生活體驗的，是由細水長流演化成的笑聲笑聲滿載溫馨，難度比飛簷走壁高N倍。

 

事業不是No.1

飛簷走壁的話題，關禮傑尚有註解，「我係紅褲仔出身，o依家仲會記住以前老師教嘅嘢：關於角色嘅，自己做到都會自己做，包括啲危險動作，嗰次（一四年）係咁，今次《機場特警》有揸車衝落海嘅情節，我都會自己做番。今時今日，無論係唔係做主角，只要係我鍾意嘅角色，我都會盡力做好佢。
「有前輩同我講過，搵到一個好角色，難過中六合彩。我覺得自己喺呢行咁耐，仲未有代表作。『好姐』嘅成功，令我知道演戲係乜嘢，同埋自己冇行錯演員呢條路，但係角色嘅代表性仲未夠強。」
仍在等待代表作的關禮傑，坦承曾有不快時，「同我同屆嘅藝訓班同學，有梁朝偉、周星馳、歐陽震華、吳鎮宇⋯⋯個個都好成功，點會未試過妒忌吖？坦白講，唔開心，以前絕對會有，但係呢一行就係咁，有高有低，令我覺得爭取快樂先係最重要嘅，我唔會將自己迫得太緊，只要我開心同舒服就OK。
「o依家唔可以醉生夢死，一定要自己做主角，松哥劉松仁同我講過，戲劇有唔同嘅題材，我咪喺唔同嘅題材入面，做好我嘅角色囉。我喺內地嘅知名度比喺香港強，所以好多時會喺內地做嘢，但香港係我成長嘅地方，所以都會一年接一個劇。o依家我嘅心態轉變咗，只係想做自己鍾意嘅事，以前要努力工作、要奮鬥，損失咗好多陪屋企人嘅時間，o依家會將家庭放喺第一位。」

家庭成員由二變三、再變四，關禮傑熱愛大家族，還表示希望女兒們婚後也跟他同住。「但係佢哋未必肯呢！」

《新紮師兄》中的「好姐」一角，是關禮傑（右二）演藝生涯的開竅之作，他稱因而愛上演戲。