我一向支持音樂，所以去年特別去捧本地製作嘅音樂劇《尋找快樂時代》場，深感感動。今年音樂劇載譽回歸，三月尾再次公演嘅《尋找快樂時代2017》，仲加入新血型男黃德斌，突破加上突破，令快樂時代更加快樂。

今次「Paco巨星飯堂」，我就帶新血德斌同舊有班底歐陽妙芝，聯同監製阿Mic，去到位於中環嘅「龍麵館」，一邊品嘗特色中菜，一邊細說復刻快樂嘅過程。

喺模特兒界別中，德斌係妙芝嘅師兄，但係一跳到演音樂劇，後者就搖身一變成師姐，仲寄語德斌放鬆，享受喺舞台上嘅每一刻。

新血強勢加盟

音樂劇喺去年公演，由一班唱家班孭飛，唱盡8、90年代金曲，獲得如潮好評。今次重演加上德斌，令可觀性、娛樂性都加碼，仲拍緊劇嘅新血，今個禮拜先正式投入音樂劇嘅排練，佢話希望有多啲時間可以綵排：「我都有同劇組講，佢哋話：『得o架啦』，希望都有五日時間，可以畀我閉關準備。」

外界有人以為德斌今次加入，大有機會唱《天與地》嘅〈年少無知〉，不過監製阿Mic就話：「如果唱呢首歌，就會令德斌嘅角色彈咗出嚟，整體上冇咁完整。而且今次搵佢飾演嘅角色，其實同佢本身散發出嚟嘅氣場有關，所以會揀番啲啱嘅歌。」

德斌話今次會參演，完全係因為受劇組誠意打動：「我啱啱喺上海演出舞台劇《我和春天有個約會》，《春天》係講6、70年代，《尋找》就講8、90年代，我覺得幾得意。加上8、90年代都係我最快樂嘅時代，我諗全香港、世界都係，因為經濟又好，o依家個個都話買樓、買樓，好似遺忘咗快樂嘅元素，都想睇吓點去經歷番。」

《尋找快樂時代》去年演出嘅時候大受歡迎，o依家喺半年內就載譽歸來，仲加入德斌（左二）呢位生力軍，我就同監製阿Mic（左一）同妙芝（右二），喺位於中環嘅「龍麵館」，暢談呢部音樂劇嘅「復刻」過程。

雖然德斌已經有演出舞台劇嘅經驗，但佢喺《尋找快樂時代2017》要兼顧演、唱（下圖），所以飯敍當日佢都話相當緊張。

 

藍莓冬瓜（$69），大廚將冬瓜球浸泡於藍莓醬汁中，以營造紫色效果，上碟時擺至葡萄形狀，係一道味道非常清新開胃嘅前菜。

龍蝦蘿蔔酥（$69/件，兩件起），餡料包括本地青龍龍蝦肉、芫茜及馬蹄粒，橙色酥皮為加入甘筍汁嘅麵粉，似足一隻熟龍蝦。

首次又唱又演

德斌喺劇中要兼顧演、唱，o依家仲喺揀歌階段。「o依家要睇吓有冇適合嘅歌，劇入面個個都係唱家班，都有壓力。上次同佢哋（劇組）食飯，食食吓佢哋一手拎起個結他就即刻jam歌，我真係好羨慕！

「喺o依家揀緊嘅歌入面，我就試緊〈交叉點〉得唔得，對我嚟講，要同時演戲同唱歌，都有啲難度，又無得NG，所以真係要練吓。」

德斌自言甚少下廚，但對煮即食麵，佢都有少少秘技：「我唔會用煮麵嘅水嚟做湯，嗰啲水我會倒，再煲過啲水先落湯粉，我覺得咁樣好食啲。」

早前德斌與劇中其他演員飯敍，佢話見到Alan（圖）、Sammy同阿偉等，一揸起結他就即彈即唱，非常羨慕。

沙薑雞卷（$59），以新鮮雞上脾加上新鮮沙薑特製味料醃製，真空慢煮三小時後取出冷藏，配上特製醬汁，風味清新。

牛高碼大骨（$439），選用美國牛肋骨醃製一日，再真空慢煮12小時，牛肉用猛油炸至表面香脆，再點特製燒汁食用。

龍肉湯麵（$149），即叫即製麵條，客人仲可選擇3款唔同嘅波士頓龍蝦配料，當中包括龍蝦鉗、龍蝦肉餛飩或香烤龍蝦尾。我推介煲足超過5小時嘅老火湯底，滋味無窮！

花拳秀腿（$99），大廚細心地將娃娃菜膽雕成花形，配以燉煮了45分鐘嘅火腿上湯，清甜可口。

妙芝安心貼士

相比起德斌嘅戰戰兢兢，參演過嘅妙芝就表現得相當淡定。「上次演嘅時候，我就好似德斌咁，見到班cast，又唔係自己嘅年齡層，個個又出口成歌，自己好似格格不入咁。但係呢個時期好快就過去，因為就算係排戲，成個氣氛都好好，我同佢哋都好快熟落。

「今次我飾演嘅角色，同上次一樣，都係先做酒廊嘅侍應，之後就做客人。上次我就要唱〈常在我心間〉，今次就仲喺揀歌階段。我都好期待再次上台，阿Mic叫我relax啲去演，就算忍唔住笑都OK，因為咁先似去酒廊happy嘅客吖嘛！」

哈哈哈！放鬆先更加享受到同觀眾嘅互動，我期待佢哋嘅演出，預祝Good Show！

再度演出音樂劇，妙芝話上次已經學識享受演出，今次雖然有些微改動，但佢對所有拍檔都信心十足。

妙芝話上次演出試過忍唔住笑，但佢話監製表示OK，所以佢就keep住一個自然嘅演繹方式。

去年演出嘅時候，老闆華仔（箭嘴示）都有現身支持。

鐵鍋：半肥瘦叉燒（$119），用上等梅肉中最嫰嘅中心半肥瘦位置，加上十多種醬料醃成，配以熱石能有保溫之效及有別於一般的賣相，一舉兩得。

京城．即燒片皮鴨（$499），以8個星期大嘅米鴨炮製鴨，加上古法烤製配上8款醬汁及蔬菜一起食用，別有風味，建議預訂。

龍麵館
地址：中環德輔道中68號萬宜大廈萬宜廊地下G04號舖
電話：25616688