黃德斌巡商場偷師

五十四歲嘅大隻佬黃德斌，同圈外女友Joyce Wong相戀多年，早排曾經公開表示希望事業有成之後，迎娶女友。佢可能為提早達成目標，所以決心離巢無綫向外闖，話晒內地拍劇嘅酬勞，相當可觀。而且，幾年前，佢仲打本畀女友喺尖沙咀開時裝店，學做生意開多條財路，唔使開工嘅日子，仲不時親自落舖幫手添。

早前，東姑喺銅鑼灣希慎廣場，見到佢同女友恩愛拍拖行街。雖然唔少人都認得佢，但係兩人完全冇顧忌，自得其樂，逐層商場慢慢閒逛，似乎係參考人哋舖頭嘅櫥窗設計，同埋有乜新貨品，從中偷師。佢哋仲一路睇，一路有商有量，十足十老夫老妻。

後來，德斌同女友行到去一間男裝便服店，見佢同店員好好傾，應該係同啲同行喺度研究緊啲潮流資訊，難得佢拍戲專業，連副業都做到咁認真。正所謂：「力不到不為財」，睇嚟佢非常明白箇中嘅道理。

德斌同女友Joyce恩愛行街，兩個仲不停四圍（目及），似乎係為自己開設嘅時裝店，專程嚟偷師。

兩人一路行，一路有傾有講，德斌仲猛指指點點，似同女友喺度不停研究。

兩個人嘅感情似足老夫老妻，一路上繞住手行街，表現恩愛。

後來，佢哋入咗一間男裝店，德斌同店員有傾有講，睇嚟係互相認識。

德斌行舖頭全程冇買嘢，今次出巡嘅目的，應該係純粹參考人哋點做生意。

早前，德斌因經常抱住一個男B出巡，而被誤會秘婚生B，不過佢就澄清個男B只係契仔。