張宇人入行會 自由黨重回商界為主正軌
做咗五屆立法會議員嘅自由黨主席張宇人,上周獲特首梁振英(CY)委任為行政會議成員,令自由黨從過往建制派「壞孩子」形象,重返以商界為主導嘅路線。該黨榮譽主席田北俊(田少)向來對CY有意見,唔贊成再有黨員加入行會與CY保持緊密關係,所以一知道呢個消息反應好大,大鬧張宇人唔尊重個黨,要求佢辭去主席之位。
自由黨本來就以商界代表作為定位,經歷幾番風雨,近年因為田少倒梁言論出位,令人覺得自由黨好似變咗反對黨。知情人士指出,自由黨大部分成員包括黨魁鍾國斌、易志明等人都親建制,只有田少及極少數成員與CY唱對台,「雖然係極少數,但以前田少仲係立法會議員,大家睇佢頭,親建制聲音被蓋過,令外界以為自由黨係壞孩子。」
今屆立法會選舉,田少在直選中排第二位出選,可惜交棒失敗失落議席,令該黨總議席減至四個,是近年新低,影響力大減。張宇人此時孭起黨內大旗出任主席穩定軍心,並立即調整路線,明顯淡化同CY嘅敵對狀態,「其實唔少黨員都想『洗底』,o依家張宇人被政府邀請入行會,同政府關係自然好轉。」
事實上,今屆選委會參選名單都見到少少端倪,田少前助理崔定邦孖住「超級梁粉」葉慶寧參選旅遊界,口號仲係「齊心一致」,同CY一二年參選特首的口號同出一轍。該黨大氣候轉得毫不含糊。
黨內消息人士話,田少與張宇人以往沒大「牙齒印」,不過日後關係難免受到影響,但消息人士話,田少當年都係行會成員兼黨主席,「為何佢o依家又叫張宇人辭職呢?」而喺廿三條立法風波中,田少喺最後關頭拒絕支持方案,其實之前並無諮詢黨內意見,而田少係之後至辭去主席一職。
消息人士認為,自由黨作為服務商界的政黨,往往要同政府有商有量,先能夠為業界爭取最大利益,「要做好橋樑角色,下下與當局對着幹根本唔掂。」佢又認為,張宇人加入行會理所當然,「佢做咗咁多屆立法會議員,從政經驗豐富,加入行會一點都唔意外。」
張宇人獲邀加入行會,有助自由黨重拾正軌,擺脫「壞孩子」形象,與政府重建溝通橋樑。
田少助理崔定邦(右),與梁粉兵團葉慶寧愈走愈近,親建制路線更見鮮明。
田少(左)與張宇人曾經並肩作戰,消息人士指入行會一事,多少都影響兩人關係。