肥彭訪港嚐美食　千金喚：「我愛香港」

末代港督彭定康（肥彭）近日訪港，雖然三位「超索」千金未有同行，但外界仍最關心三千金嘅近況。但肥彭嘅回覆可能令港男失望，因為三人已為人母，其中大女彭潔思（Kate）現從事演藝行業，二女彭麗思（Laura）就是運動導師。

至於回歸前喺香港讀中學嘅么女彭雅思（Alice），早前喺社交網站高呼「我愛香港」，又不時上載兒時在港生活照。肥彭話，么女仍有與香港舊同學見面，早前更到美國參加舊同學嘅婚禮。肥彭又話，三千金最懷念香港夠「自由」，當年佢哋夜蒲，都無乜照片見報。

肥彭向來為食，當年試食「泰昌蛋撻」成為該店嘅「生招牌」，今次訪港再食撻，佢話美味依舊，仲講笑咁話「泰昌」開咗咁多分店，應該分啲股份畀佢。除咗蛋撻，佢亦懷念港式蒸魚，「香港擁有全世界最好嘅食物！」

肥彭三名千金（前排）離開生活多年嘅香港，仍不時喺fb留言話好掛住香港，但對肥彭來講，港式美食最令佢記掛。