田少拍片扮黑客 自嘲幾十歲轉行

自由黨榮譽主席田北俊卸任立法會議員後，最近加入黑客組織，仲要親身上陣打大佬？實情原來係田少接拍一套以「黑客」為主題嘅電子遊戲宣傳片。

呢條片長約七分鐘，田少飾演「黑客田少」。雖然戲份只得十五秒，對白亦得一句「唔好意思打搞晒」，但佢一身西裝打扮，正義凛然咁從後巷行出來，十分搶鏡。田少喺自己fb專頁不忘宣傳新片，自嘲話：「幾十歲人先來轉行，學人拍廣告、扮武打演員。」

田少向本刊透露，今次演出係義務性質無收錢，純粹為支持年輕人成立的初創公司。

佢話呢個鏡頭拍咗近兩個鐘，蝦碌主因係對手向佢揮拳時，佢總係忍唔住笑咗出來，最後要拍三、四個Take先收貨。「表現咁差，驚之後無人敢搵我拍。」佢笑說。

田少扮「黑客」為一套電子遊戲拍宣傳片，佢話NG咗三、四次先收貨。