七十歲的劉江，人稱劉老師，因為三年前一張「X！講呢啲！」cap圖，一直備受網民熱捧。「我冇facebook同微博，我係好耐之後有日覆人哋WhatsApp講『恭喜發財』，點知對方話：『講呢啲？』就整咗嗰張cap圖畀我先知，我都冇諗過嗰個表情，會夾到呢句說話，幾有創意、幾有心機呀！哈哈哈！」

雖然貴為資深實力派的甘草演員，但劉老師卻零架子，拍照這天，攝影師要求他拿着雞毛掃在士多裝兇作勢，他即在鏡頭前七情上面，拍完、翻看照片，連他自己也忍不住笑，就如最近看他在《一屋老友去旅行》中，跟「寶家」仔女打成一片般，親和力十足。

「係開心嘅，《一屋老友記》出嚟受歡迎，跟住就開個旅遊節目，之前都未試過。我都係第一次拍呢啲，唔係好習慣，因為冇劇本，完全要自己噏。

「有啲人話：『呢個節目睇到你真嘅一面呀！』其實又未必，啲說話內容幾時真、幾時假，我自己都分唔清，哈哈哈！咁旅遊節目，點都要搞吓氣氛o架嘛，你估樣樣介紹嘅嘢都會令人咁興高采烈咩？好似有次，叫我哋介紹雪糕……」接着他做了個cap圖表情出來，再利申：「不過人哋度咗出嚟，梗係要照住做啦，係咪先？哈哈！」

畢竟，相比他從小到大所經歷過的，要他食杯雪糕都搞氣氛不過是小兒科。

 

別無選擇

劉老師生於一九四六年，對下還有三弟一妹，一家七口住在調景嶺的木屋，靠做地盤的父親獨力養起整頭家。「我老竇做泥工，仲唔係日日有得做，我細個好少見到佢，如果佢有工返，就一早出咗去，好夜先返；如果佢喺屋企，就成日叫我幫佢買酒。」

他十二歲那年，台灣京劇學校來港招生，見有膳食住宿提供，他二話不說便報考，減輕父親重擔。「生喺嗰個年代，就自然會有嗰條路，別無選擇。」結果他獨個兒搭三日兩夜船到了台灣去，一去便八年。「一百○八個同學，全部差唔多年紀，有男有女，我哋出唔到去，買唔到嘢，有時放假都要睇吓師傅心情，如果好，就會帶我哋去行吓山，我哋咪分兵同賊周山跑咁囉。

「嗰段時間，感覺唔係咁好o架！禮拜日，啲家長嚟探同學，喺操場個個噓寒問暖，我就自己一個人；啲同學個個屋企人都會煮啲紅燒肉、五花腩、豆腐乾畀佢哋，一食飯就個個攞出嚟演嘢，但係佢哋唔會分啲畀我o架，我咪只係得個望字囉！其實我阿媽都有試過一次走水貨過嚟探我嘅，但咁多年我都係靠寫信同佢哋聯絡咋。」說罷，他哈哈哈笑了，但見眼神帶點無奈。

《一屋老友記》收得，最近播的《一屋老友去旅行》繼續大賣「寶家」溫情。「呢個節目係想叫啲後生仔，多啲帶老竇老母去旅行，個訊息好好呀！」

六五年，已屆二十歲的他（前排右二）回港前再與同學合照，後排右一為七十年代台灣紅星秦祥林。

劉老師（最前排左二）十二歲剛到台灣學京劇時，跟同學合照。「嗰八年，o依家諗番嘅感覺都唔係咁好，但人生就係要面對、接受同向前行o架啦。」

跳咪跳囉

六六年回港後，他在劇校師傅引薦下當了武師，曾試過在八個貨櫃、約十二層樓的高處一躍而下。「嗰場戲話我畀人一拳打過嚟，我就跌咗落去，嗰個年代冇吹氣軟墊嗰啲嘢，地下只係用啲裝橙嘅紙皮箱墊住。」

接着，他即想起了最後一次搵命博的演出。「八八年拍（電影）《我要逃亡》，嗰場戲講我同萬梓良、劉青雲同另外一個武師，畀人追捕，要喺金獅花園個平台跳落嚟，我本來諗住用替身o架，但佢哋幾個都係自己跳，個導演同我講：『你以前做過武師，你得嘅，如果你都用替身，咁佢哋咪全部都要用？』部cam低炒咁拍，只可以墊兩塊薄嘅軟墊，我睇一睇個高度，OK嘅，點知一跳落去，衝力好大，嗰吓真係知道自己老囉！」

話說回來，劉老師那些年當過武師後，亦曾當過配音員、投考過邵氏南國訓練班，又跟國泰電影公司簽過演員合約，兜兜轉轉才加入佳藝電視成為藝員。直至七九年佳視倒閉，他便過檔麗的，拍過《浮生六刧》、《大俠霍元甲》和《人在江湖》等劇集。「拍《大俠霍元甲》，我做驃叔（董驃）個仔，佢好錫我，私底下都當我仔一樣，收咗工就帶我去食飯、揼骨，我有次請番佢食飯，去到餐廳，叫佢隨便叫嘢食，結果佢乜都唔叫，淨係叫咗碟飯，哈哈哈！佢就係個咁嘅人。」