歲月是殘酷無情的，不會為誰停留。
看陳敏之，少女時以歌手身份出道，輾轉下加入無綫，以四十三吋長腿獨步演藝圈，轉眼間，其年齡也跟腿長一樣，還於去年獲得第二個「十年金牌」。
「喺一間公司打足廿一年工，我覺得係一件好有意義嘅事！我青春最黃金嘅時期，到呢家呢個年紀，都奉獻咗俾公司，當然，我得到嘅都好多，識到好多唔同嘅人⋯⋯
「我好騰雞o架！可能我高頭大馬，好似好有台型咁，其實我初初入TVB嘅時候，試過做台慶司儀前，緊張到成隻手出晒風癩，但神奇地，做完又冇晒o架喎。」
隨着歲月流逝，事業上可以愈做愈淡定，陳敏之於劇集《黯夜守護者》中，飾演其女兒的已是芳齡廿七的江嘉敏；鏡頭後的她，也成了人妻、人母，兒子也五歲了，「我覺得我嘅成長，係定律嚟嘅，喺啱嘅時候結婚、生小朋友，到????家兼顧家庭、事業嘅同時，就算四十三歲，都要繼續追夢，咁先至不枉此生。」
陳敏之的自信從哪兒來？不用質疑，也是歲月這個好東西。

 

 

角色

廿一年轉瞬即逝，也為陳敏之豐富了人生的閱歷跟履歷。這些年來，她拍了超過四十部劇集，而播映中的《黯夜守護者》，是第四十一部。
「最初監製話，江嘉敏係我個女，我都有啲猶豫，但係後來我同監製再傾，了解咗劇情，現實生活都有咁嘅情況，而且江嘉敏都唔會叫我媽咪，都好有說服力吖！
「呢部劇暫時係我最後一部劇集，因為呢幾年疫情，我都冇拍劇，反而開咗自己嘅YouTube Channel，又準備做生意，嚟緊十月就推出我嘅護膚品牌，都要花多啲時間去做。」
角色的增多，不但沒有令陳敏之感到疲累，她反而愈忙愈起勁。
「YouTube Channel開咗一年幾，由內容到製作團隊，都係我自資做。錢只係有限數，重要嘅，係我嘅坐言起行。以前後生啲，我做好多嘢都冇乜信心，對成敗得失睇得好重，好似開YouTube Channel，會諗會唔會冇人睇、人哋唔鍾意點算？
「到有一次同Coffee飲tea，佢好鼓勵我去做，咁我就的起心肝，由Tea嗰日到出第一條片，一個月都唔使，就做到o依家嘞。」
至於即將推出的護膚品牌，更是她的夢想成真。「我鍾意做生意，於是就諗做咩生意好、點樣做得專業啲，我用護膚品，我相信唔少女人同我一樣，所以就決定推出自己嘅護膚品牌。
「跟住我就報讀證書課程，去了解製作過程，要記方程式，又要做實驗。以前讀書，我數學同Chemistry都麻麻哋，今次考cert都係死記啲方程式，一Take考到。」

 

BB

減少拍劇，最主要的原因，就是為了五歲的兒子雷子樂。「一拍劇嘅話，除咗長時間，仲日夜顛倒，以前就得，o依家我老咗⋯⋯哈哈！其實真係想陪住子樂成長，睇到佢開心，我就心滿意足。
「我做生意，除咗係自己鍾意之外，我都想個品牌可以做到子樂大個嘅時候，俾佢見到媽咪都做到啲嘢，留到啲嘢俾佢。」
不用想得太多太遠，現時只要兒子一些貼心舉動，也可以令陳敏之樂上半天。
「我細個嘅時候，唔會攬住爸爸、媽媽講I love you，但子樂好sweet，成日會攬住我同我老公講，同我阿媽FaceTime，佢都會好sweet咁話：『婆婆，I love you，I miss you so much！』，補番數又可以令婆婆開心到不得了。」
陳敏之的日常，也因兒子而有一定變化，但一些小回報，已令她極冧。「o依家我每日六點起身，之後車子樂返學，雖然有校車，但係我都想陪多佢十五分鐘。夜晚我就會九點前陪佢瞓，到佢瞓咗我再起身做嘢，第二日再起身車佢返學。
「我鍾意叫個仔BB，佢o依家都仲會咁樣叫自己，有次佢打電話俾我，同我講：『爸爸都做緊嘢未返，你可唔可以同爸爸講，BB都好掛住佢呀？』，係咪好Sweet呢？」

◄其子雷子樂轉讀國際學校，實為陳敏之的無心插柳，「我諗住俾佢試吓考，考唔到就讀傳統學校，但佢考到喎，學校又一條龍升中，我呢個媽咪都可以唞吓。」

陳敏之強調，跟丈夫雷偉信拍拖九年，因為「長長久久」便於一四年成婚，二人即將慶祝結婚八周年，相伴十七載，並不簡單。