當年齡去到3字尾4字頭，數字上的確難以被稱為「後生仔」，不過這次本欄目說的，是好兄弟，所以四十一歲的白只，和三十八歲的楊偉倫（阿卵），就不會被質疑了。
同為演藝學院畢業生、獨立樂隊「朱凌凌」的隊友，又曾同台演出舞台劇，下月中又有新作《囍雙飛》公演。台下的二人相識近廿載，一同成長。
男人的浪漫，跟男女的推拉一樣，吵鬧有時是生活情趣。
事例一：談吵鬧時，這秒阿卵咬着拇指說：「冇！（爭拗）」其身旁的白只已發聲：「就呃你嘅！哈哈！吵得最多嘅，係有陣時佢食飯唔預我，或者嗌啲嘢食又冇諗過我呀⋯⋯（一望對方）你知食物對我幾緊要o架啦！不過呢個（一指對方）對食物又好執着嘅，淨係食海鮮o架啫。」
阿卵點頭延續：「係，係。所以吵鬧最多就係食飯嘅時候，有時兜咗兩個鐘都未諗到食乜，佢就會忟憎。」
事例二：用電器形容好兄弟，白只即答：「佢對於我嚟講係叉電器，『朱凌凌』班友，特別係佢（阿卵），我有咩心情好嘅、唔好嘅，我都想見到佢，會專登搵佢出嚟，或者去佢屋企樓下，噏番個零兩個鐘，我就叉到電，可以繼續行囉。」
話畢，他便望向阿卵：「都係一種讚美囉。」後者一臉淡然回應：「多謝！我接受。」白只再問：「咁我係乜嘢呀？」
阿卵無表情答道：「電腦！佢諗嘢好叻，好多時同佢傾偈，喺同一件事上，佢已經諗咗好多步之後嘅嘢，我係完全冇諗過嘅。（望向白只）所以你個腦可能有事呀！」
綜合以上事例，看二人的「打情罵俏」，你大概不知他們各有另一半，不過就是因為是好兄弟，才會你吵我鬧，這樣傾偈，才能傾足一世。

 

 

吵吵鬧鬧

原名凌智豪的白只，於〇五年和阿卵，還有同樣出身演藝學院的朱栢康、朱栢謙及陳文進，組成獨立樂隊「朱凌凌」，後來各人各自發展，只偶爾「合體」。這次舞台劇《囍雙飛》集了三個「印花」，可算近年少見。
只：白只 卵：阿卵 東：《東周刊》
只：對上一次已經係三年前。
卵：牛池灣？（另一舞台劇的演出）
只：係囉。呢幾年做嘢都好少遇到佢哋，各自都做緊唔同嘅嘢，今次聚埋真係可以吵吵鬧鬧囉。
卵：冇合作就好啲，唔使一齊做嘢，仲可以相敬如賓吖嘛！
只：好彩今次個劇係分Piece（部份）去演，我演兩個，佢演三個，加埋朱栢康兩個，全部講男女關係，咁唔會太吵鬧啦。

白只的好兄弟，還有已為人夫的張繼聰，早前後者於海外工作後回港，先約前者相聚，引起張太謝安琪的「不滿」，都說兄弟情有時比愛情更冤氣。

Quality Time

訪問期間，二人時而「拳來腳往」，時而「甜言蜜語」不缺，一人一句沒有冷場，連講跟女友的相處方式，也是絲絲緊扣。
只：拍拖係雙方都要「咇時間」，即係勤力工作嘅同時，都要勤力拍拖。
卵：（點頭認同）
東：咁咇時間出嚟做咩？
只：咪俾人影到嗰啲囉。（《東周》按：他跟女友顏卓靈先後於一六年及二〇年，被拍到分別於車廂及公園內狂吻）
卵：哈哈哈哈哈！
只：最主要嘅原因（無再被拍到），係COVID-19期間，佢（顏卓靈）唔喺香港，咁我哋有段時間都只係傾電話，但Once我哋都喺香港，都一定會出去行吓，沿住海邊真係散步囉。如果一個月有三十日，我哋呢個活動都幾係鐵膽o架，每次行兩、三個鐘，一路行就佢噏吓、我又噏吓咁。
卵：真係浪漫囉，維繫得好好囉我覺得。
只：到你評論嘅！
卵：我欣賞啫，因為我唔係咁吖嘛。我另一半有同我講，兩個人相處，見到面、一齊食飯，但唔係Quality time（優質時光），可能唔係話做嘅嘢唔同咗，只係好多時人會Take it for granted（理所當然）咗，所以真係要將意念，放番喺對方身上。
只：起碼要有一個共識，好似兩個人一齊嘅時候，個電話就一定唔掂o架嘞。
卵：係！除非一齊掂！
只：一齊掂同一個？定係俾對方Check電話先？
卵：唔係，好似有啲Game，可以兩個一齊玩嘅。
只：佢（阿卵）就會囉，因為佢嘅另一半都鍾意打機，但係我哋就唔會，可想而知佢（女友）幾悶。
卵：但係散步都幾舒服嘅。
東：有冇諗過拉埋天窗？
二人有默契地保持沉默，並於攝影師示意下，調整咪高峰，還被同場的舞台劇導演張銘耀戲謔：「頭先又唔見咁緊張支咪？」
卵：會o架（咬着拇指），快o架嘞！
只：我哋就未有一個諗法，所以都係事業為重啦！