蒙德揚父子兵

早前信興集團掌舵人蒙德揚獲浸會大學頒授榮譽社會科學博士，太太自然來賀佢，細仔Justin（見圖）亦首次亮相。同爸爸一個餅印嘅佢，今年在喇沙書院唸中六，明年就要考DSE。佢同爸爸一樣鍾意運動，網球游水都啱，仲有參加公開賽，笑說爸爸游水、打網球可能唔夠佢叻，所以去玩跑長跑，而佢就對跑步興趣麻麻。

兩父子感情甚好，令人想起蒙德揚小時候，一樣都係由父親蒙民偉身教而成長。記得佢兩父子不時去釣魚，一坐就半日，蒙民偉會借機談一下人生道理。有次釣魚蒙德揚將糾結成一團的魚絲拼命用手亂拉。蒙民偉就叫兒子稍安毋躁，平心靜氣找出魚絲頭，一定可以解開的，比亂拉亂扯最終成捲魚絲報廢要好；結果他真的慢慢解開了線頭。這個故事，蒙德揚到今天都記得，用在解決業務和人生難題都用得着，就是切忌急躁，睇到問題的源頭，再想辦法解開。

佢從蒙民偉手中接過電器王國初期曾對筆者說，父親當年和一位日本人以手為諾，憑個「信」字起家，他對未來難免戰戰兢兢，因為父親打造的王國這麼成功，而父親亦是個要求嚴格的人，他對自己要求更高。

蒙民偉白手興家創立信興，屹立香港六十三年，香港唔少人都可能用過信興代理的產品。今次蒙德揚拿到博士學位，浸大在讚詞表揚他在商界長袖善舞，將信興業務帶上新高峰，證明他這些年來的努力得到認同。讚言又話佢公司業務以外同時熱心公益，每年聘用二十名實習生，而對實習生的要求之一，就是要大家一齊做義工。

蒙德揚除了有工程學位和工管碩士外，仲可以講四國語言，而全世界到處參加馬拉松的他笑說，跑步好像做生意一樣，每一次都有新挑戰，也有意想不到的意外。他好明白創業難守業更難，加入信興二十五年，去年當上主席及CEO的他直言因為爸爸，更加唔衰得，點都要頂住。