外界向來視開髮型屋和做髮型師的人，為學業不成的一群，而La Môd Salon行政總裁邱國銘（Alexis），卻絕非如此。他曾留學美國，並主修工商管理，在他的心目中，無論做甚麼生意，只要管理得宜，自然商機無限。

「當年我畢業返香港，機緣巧合下遇到當時Salon嘅老闆，佢哋當時經營不善，公司正處於虧損狀態。而我對呢行又有興趣，加上我嘅性格鍾意挑戰，亦覺得呢門生意有得做，所以就決定接手。」

當年只有二十一歲的小伙子，憑着一個「信」字，成功將一間藉藉無名的髮型屋，發展至今提供全面護髮美容服務，在業界中得到肯定，並吸引周麗淇投資過百萬入股，相信他定有其優勝之處。

自認貪靚的他，原來已維持這個髮型達五年之久，「我鍾意整齊同清爽，雖然係無變化，但我keep住兩個星期左右就會修剪一次，而且每日都會gel頭。」

去年，周麗淇以總裁身份與拍檔Alexis主持La Môd Salon的分店開幕，其好友陳凱韻（甘比）畀面到場支持。

好勝心強

訪問在La Môd Salon位於銅鑼灣禮頓道的地舖進行，坦言貪靚的Alexis，進行拍攝時，不時向攝影師笑說：「影得我瘦啲呀！我點企好呀？」當攝影師把拍攝完的照片給他看時，他即點頭大表滿意地續說：「OK！你哋唔好怪我呀，我諗做我哋呢行，個個都貪靚，如果唔貪靚又點可以幫人扮靚呢？」

於美國明尼蘇達大學經濟和工商管理系畢業的Alexis，自小已熱愛與時尚相關的事物。「中學初期，我已經好鍾意睇時裝雜誌，特別鍾意留意唔同人嘅髮型。所以喺中五嘅暑假，我就去咗髮型屋做兩個月Junior，幫客洗頭染髮。」

當時已對髮型行業產生興趣的他，於○四年畢業回港後，便遇上加入這行的機會。「我記得當年啱啱畢業返香港，正考慮做咩之際，就遇到當時開La Môd Salon嘅老闆，而佢哋正處於虧損狀態，想搵人接手。咁啱我一直都對呢行有興趣，又鍾意接受挑戰，所以就決定接手。」

接手初期，Alexis曾遭家人極力反對，更遇上不少問題。「我嘅家族一直係經營貿易同飲食等生意，而我父母當時覺得我讀咁多書，唔應該做Salon。但係我好勝心好強，決定做嘅事一定要做，仲一定要做到啲成績出嚟。後來父母見到我嘅付出同努力，亦漸漸見到我嘅成績，佢哋都開始放心。

「接手嘅時候，我得二十一歲，個個都覺得我係一個乳臭未乾嘅o靚仔，覺得我人生經驗未夠。試過有啲老牌師傅，表面上冇乜嘢，同你好好傾，點知第二日全部走晒，原來佢哋喺隔籬開咗另一間新髮型屋，仲搶走晒我哋啲客。」十多年來經歷過無數挫折後，現時的Alexis，已學懂了不少。

今年公司的周年晚宴，Alexis和周麗淇請了很多藝人到場，當中包括卓韻芝和Kevin Boy（李健宏）等。

一五年，為慶祝髮型屋開業十周年，Alexis特別與花藝師Kirk Cheng合作，在店內添置一個以花為主題的櫥窗藝術品，以花喻髮。