記憶中的狄波拉，是女人味十足的華麗代表。最為人津津樂道的，則莫過於多年來，她經常跟「前度」謝賢、「現任」江耀城（鬍鬚Kong）、霆鋒和婷婷五人行，當中的氣量，叫外人佩服。

六十五歲的拉姑，現在風采依然。訪問這天，她穿上桃紅色的背心大衣，霸氣現身，為好友的餐廳，擔任開幕剪綵嘉賓。「今日人哋要搵拉姑，我就搵番件咁樣嘅『拉姑衫』着。」

久未做過訪問的拉姑，拍照時感到很不自在。「我覺得自己好out，我同攝影師講：唔得嘞！擺唔到甫士嘞！」

縱然口裏這樣說，拉姑還是熟練地擺起甫士，從容地解說她的「五人行」。「o依家喺街仲有人叫我謝太，無問題o架！我個鬍鬚Kong知道我擺謝家喺第一，霆鋒、婷婷係第一o架！我好感恩，江家容許我可以咁樣。」

千帆過盡，拉姑深明華麗只是包裝，她選擇還原基本，才是真正的幸福。

拉姑年輕時很執着，現在學懂放下，便是自在。「我細個要分黑就黑，白就白，乜都要分得好清楚；大個就覺得唔需要分得咁清楚，跟住個心，跟住年齡，執着係令自己攰，又累埋身邊嘅人攰，我學識咗啦！」

近廚得食

前夫是謝賢、兒子是謝霆鋒、女兒是謝婷婷，拉姑的名字，順理成章地經常出現在娛樂新聞裏。而她的「往績」也相當彪炳：於七三年參加非無綫舉辦的《香港小姐》選舉獲冠軍，繼而投身影視圈，七六年憑長劇《狂潮》飾演雷紅而走紅，後來為了跟四哥拍拖才退出。
但潮流興老將復出，拉姑聞言即耍手又擰頭。「由細到大都唔鍾意，我係演藝界入面逗留得最短、作品最少嘅人，因為有四哥、謝霆鋒、謝婷婷『能』住至記得我。我抗拒o架！因為我覺得自己唔叻，喺《狂潮》紅咗咪快啲走囉，見好就收。」

老來從子，她現在最希望日日見到仔女，「以前霆鋒拍戲唔畀我去，話跳落嚟嗰吓（跳樓），我會畀壓力佢；佢受傷第一件事係唔好畀阿媽知。我以為講煮飯可以同佢分享到，原來實情唔係喺節目睇到咁嘅，後面（幕後）係幾驚，揼個磚、挖個窿就叫爐。佢話：『阿媽你睇到會唔舒服。』。因為我有個潔癖，喺外面唔可以隨便去洗手間，佢哋要幫我探路，睇吓邊個洗手間乾淨，（如果去大陸？）咪無得諗囉！佢通常喺大陸。」

霆鋒憑「鋒味」得「米芝蓮之友」榮譽，拉姑早前在霆鋒主理的澳門星級晚宴上感動落淚，說起兒子的成就，她無比驕傲。「《12道鋒味》成個團隊好艱辛，我好佩服霆鋒嘅堅持同勤力！人哋煮十幾個鐘嘅咖喱，佢只係用廿分鐘，我好多朋友讚，點解一嚿豬頸肉，可以變咁多嘢嘅？我覺得佢有拍戲底，乜都識得變同執生。」

霆鋒曾透露以前同家人關係不緊密，自從入廚後才發覺不是為自己，是為家人，所以每次返港，謝家便會有聚餐，拉姑甜笑說：「我o依家無機會煮嘞！坐定定有得食，嘩！好開心！」拉姑同樣是下廚高手，她自從嫁作謝家婦才開始做煮婦，廿年來照顧謝家上下，一日三餐，名菜有喇沙，獅子頭，砂窩魚頭⋯⋯「我唔可以講叻，我最擅長係打開個雪櫃，見乜煮乜。我今日煮豬腩肉，但得牛肉咋？無話唔得嘅，識變通係我同阿仔唯一相似嘅地方。」

拉姑每年去泰國朝聖兩至四次，很多人覺得她是「代言人」。「年年好多人問我，點拜四面佛？又問我講廣東話、國語，四面佛識唔識聽？任何人用個心去講，菩薩都識聽。」

四面佛緣

眾所周知，拉姑篤信四面佛四十五年，每年總會去泰國二至四次，外界當她是代言人，傳聞她曾在四面佛前跳脫衣舞還神，她竟笑着主動提起：「o依家仲有朋友跟完泰國團返嚟話，個團長喺架車度仲講緊你（跳舞）。唔緊要啦！啲人鍾意聽，聽慣咗就當真，我借呢個機會澄清番，我未有剝光豬跳舞咁嘅膽量。」

拉姑自六七年與四面佛結下不解之緣，那年她當選「阿高高小姐比賽」冠軍，之後曾病重，被人抱到四面佛面前祈求，不久便痊癒，自此她深信四面佛有求必應，總在她身上行奇蹟。「我唯一一次跳舞，係廿年前，我因急性類風濕行唔到，坐過半年輪椅，我同四面佛講，如果你畀我好番，我就跳一次舞。我好番之後，就請咗八個人喺四面佛前面跳舞，我着住泰國服，喺後面一齊跳，我仲記得佢哋叫我隻手要咁樣（擺手）。」

每次參拜四面佛，拉姑所許的願望，多年如一。「我跪低一開口就講：『保佑我兩個兒女出入平安、保佑四哥、保佑謝家、保佑嚟拜你嘅人。』如果天下大亂時，就話菩薩啊！菩薩，天下大亂嘞，冇乜特別嘅，好似同長者傾偈咁。」

拉姑家中也有安奉四面佛，早晚参拜。「四十幾年嚟，每日一杯水、一扎花，過去廿年四哥每日早晚都上香，呢個老公（鬍鬚Kong）又畀佢嚟上香。」

謝家一開餐，個個要關手機，「唔睇手機，唔接電話，呢餐飯係同家人分享。」

四哥和拉姑是當年的恩愛夫妻，誕下霆鋒（右一）和婷婷（左一），一個「好」字的模範家庭。