華人置業前主席劉鑾雄（大劉）突然喺報章及刊物發聲明，澄清與呂麗君早已分手。

大劉表示近月有唔少關於佢哋嘅失實報道，所以要發聲明澄清兩人早於一四年已正式分手，再無任何關係。分手後，兩人嘅接觸僅「限於她是兩名年幼子女的母親，僅此而已，並無其他。」大劉又稱，「對於本人與呂小姐的一對子女，本人一直負責他們的生活、教育及其他開支，即使與呂小姐的關係已了斷，也會繼續履行父親的責任。」

大劉（右）出聲明，強調與呂麗君（左）早於一四年已正式分手，再無任何關係。

大劉喺聲明提到分手前，佢一直照顧呂麗君嘅生活，送佢大量現金、首飾及禮物，總值超過廿億元，「她現在已是超級富婆，無需要我任何經濟支持，也可過着富裕的生活。」

聲明續透露，大劉與呂麗君去年已訂立書面協議，「同意各不相干，互不拖欠，各自生活，絕不騷擾對方及各自的家庭朋友，雙方並承諾不會向對方要求或追討任何資產權益。本人沒有責任亦不會再照顧呂小姐或給予她任何金錢或其他饋贈。」

大劉考慮到子女還年幼，需要照顧，因此同意讓呂麗君住喺佢為子女安排嘅大宅內。大劉強調，讓呂麗君享用佢為子女安排嘅車輛及私人飛機，只為方便照顧和陪伴子女。同時，大劉透露佢畀子女嘅生活費，會交畀呂麗君處理。但強調「這一切安排絕對不代表本人對呂小姐的任何關照或愛護，純屬為方便照顧兩名年幼子女，有關安排將因應情況而更改，本人亦保留一切變更、改動及修改的權利。」最後，佢希望外界明白佢與呂麗君已經斷絕關係，不要再作錯誤報道或揣測。

與大劉分手後，呂麗君仍能享用大劉為子女安排嘅大屋及車輛等。

大劉與三十八歲嘅呂麗君結緣十多年，成為跟得女友後，女方身家不斷暴漲。○六年，大劉將山頂白加道三十一A獨立屋轉贈呂麗君，市值約四億八千萬。呂麗君亦以公司名義持有中半山雅賓利大廈中層單位連車位，約值九千萬元。

一○年初，有外國傳媒報道大劉豪擲四億二千萬港元，喺英國買入Eaton Square（伊頓廣場）六層高大宅，據報當時由呂麗君到當地收樓。

大劉一向愛錫子女，以往也贈送唔少珠寶等禮物畀呂麗君及兩人女兒，包括以呂麗君女兒「Zoe」命名近十卡嘅鮮彩藍鑽，以及Cartier設計、十點一卡枕形緬甸天然紅寶石連鑽石胸針等，連同珠寶設計師趙心綺設計、用八點幾卡緬甸「鴿血紅」天然紅寶石打造嘅緞帶戒指，加埋市值最少接近四億。

另外，大劉又曾向呂麗君母女送贈兩艘共值一億四千萬元嘅遊艇，呂麗君同是兩匹馬嘅主人，以及八間本港註冊公司嘅董事，一三年成立呂麗君基金會。

大劉在聲明中形容，呂麗君曾接受佢廿億禮物，已是超級富婆，毋須大劉經濟支持。

落選港姐變富婆

呂麗君出身小康之家，爸爸係美德塑膠廠老闆，呂麗君九八年選港姐落選，三年後原本疊埋心水去英國倫敦大學讀碩士，誰不知兼職做LV售貨員期間遇上大劉，改變佢一生。

有傳大劉當初畀呂麗君唔做作、率直、又無機心嘅性格吸引，二人邂逅後火速撻着，○一年呂麗君加入華人置業，主力做內地投資業務，第二年仲同大劉生埋大女劉秀盈。

○二年產後，求學心重嘅呂麗君即刻返去英國倫敦大學國王學院，攻讀化學工程博士，○六年畢業回港，經常孖大劉出席公開活動。與此同時，大劉被爆與前娛樂記者陳凱韻（甘比）發展戀情，甘比無耐幫大劉生咗個女劉秀樺。呂麗君期間以「劉太」身份發聲明，質疑劉秀樺非大劉所生，令大劉大怒，反罵佢：「有錢就身痕、鞠躬一百次都無用！」有傳佢一度被打入冷宮。

呂麗君（右）與大劉結緣十多年，惜已此情不再。

不久，呂麗君與大劉修復關係，一○年為大劉生咗個仔劉子鋒。但一二年，甘比亦生下細仔劉仲學，同年二人一齊加入華置做執行董事。近年不時傳出大劉與呂麗君分手消息。今年八月，有報道指呂麗君與大劉因性格不合，早已分手一年多，當時呂麗君辭去華置執董，話要專注搞慈善。早前，更有傳呂麗君帶埋個仔去華置辦公室，要求見大劉。

大劉與呂麗君分手有迹可尋，佢哋近一年已絕少雙雙出席公開活動，相反甘比與大劉就形影不離，最近一次係新世界創辦人鄭裕彤（彤叔）嘅喪禮，陪伴大劉身旁嘅亦都係甘比。

近年，甘比（左）與大劉形影不離，圖為兩人出席彤叔喪禮的情況。

呂麗君部分資產