落選議員搞傳媒　毓民辦網媒唔玩補選

傳媒步入寒冬，但人稱「教主」嘅前立法會議員黃毓民逆市搞網媒，聽講埋班工作進入尾聲。佢接受查詢時，自嘲：「o依家無人搵我寫稿，自己要開個地盤寫吓評論文章。」佢仲打算請十名好友寫文，主題以兩岸及國際新聞為主，至於佢熟悉嘅香港政治新聞，佢話：「都會寫少少，坊間太多人寫了，我無謂爭。」網媒燒錢犀利，有無人揼水？「人手唔多，開支有限，唔使乜嘢金主。」

九月佢喺立法會選舉輸畀青政游蕙禎，o依家對方因宣誓風波隨時落台，有機會舉行補選，但毓民話：「仲補乜鬼選？我唔會再選。」

同樣選戰失意嘅前立法會議員黃成智都轉型做傳媒人，有份投資上周五面世嘅免費報紙《見報》。不過，創刊號好快畀眼利嘅網民發現，報道一宗吊頸自殺案時，將「吊」字錯寫成粗口字眼，喺網上瘋傳。

黃毓民着手搞網媒，表明如果有補選都唔會參加。