近年星二代輩出，個個挾着父母之名，大舉進軍娛圈，一時間乜乜之子、物物之女，排住隊成為大眾關注的對象！

林嘉華和前無綫電視服裝指導劉寶珍的兒子林政峰（Jefford），卻相對地低調。這天首次見面，他禮貌地自我介紹：「我叫做林政峰，可以叫我Jefford。」

現年二十八歲的他，本來在「父蔭」之下，要在娛樂圈佔一席位，理應毫無難度，不過在加拿大土生土長、生活簡樸的他，卻聲言對這個圈不感興趣。「雖然我父親做藝人，但由細到大我都冇諗過要入娛樂圈，我只係對攝影同時裝有興趣，希望做一個出色嘅攝影師同時裝設計師，爹哋都好支持我o架！」

有理想、有抱負，仲有個星爸背後力撐，成功的青雲路，又邁進了一大步。

他熱愛攝影，最愛拿着Leica SL相機周圍影，把不同地方的人生百態和景致拍攝下來。

攝時間

眼前的Jefford打扮樸素，穿上T恤闊褲，頭戴CAP帽，說話斯文有禮。在加拿大土生土長的他，一口廣東話相當流利，「雖然我在加拿大出世，但屋企人由細到大都同我講中文，而且我細個曾經喺中文學校學過中文，講係完全冇問題，但要我寫同睇就……哈哈。」陪同兒子前來訪問的母親劉寶珍笑說：「以前佢當啲中文字係公仔，學嘅時候要喺旁邊加英文注音先識讀，我諗佢識嘅中文字，只有香港小學生二、三年級程度。」

雖然父母從事演藝相關工作，但Jefford卻不像其他星二代般「以父之名」躋身娛圈，反而努力發展自己喜愛的攝影事業，「其實我好細個已經鍾意攝影，可能呢個都係爸爸嘅嗜好，所以我哋經常都會一齊研究。在大學時期擁有第一部Canon菲林相機後，我就對攝影愈嚟愈沉迷，去到邊我都一定會帶住佢喺身，尤其去旅行，我除咗擔任父母嘅專用攝影師外，仲會影低當地嘅所見所聞，好似返到嚟香港，我就最鍾意影街道上嘅景物，例如電車同渡海小輪等，因為呢啲都係香港嘅特色，其他地方影唔到。」

在加拿大長大的林政峰，與父母外遊時，機不離手，去到邊影到邊，其母親亦受她感染常常自拍。

林政峰與父親林嘉華和母親劉寶珍感情很好，一家三口經常結伴出席在加拿大舉行的公開活動。

現居加拿大的Jefford，在當地的雜誌社擔任攝影師，他說：「我主力係影產品，間中都會影模特兒，我比較崇尚自然，所以好少會用電腦執相。」能成為外國雜誌的攝影師，以為他必定修讀過專業的攝影課程，但他卻說：「我冇真正學過攝影，所有攝影技巧，都係我平日上網研究，有時會向爸爸嘅導演朋友請教，邊影邊學。」

除了攝影外，Jefford亦受母親熱愛時裝的薰陶，萌起當時裝設計師的念頭。為了實踐夢想，兩年前他在OCAD University（安大略藝術設計學院）修讀製衣和有機紮染課程。「媽咪同我講，如果我真係想做時裝，一定要識得件衫係點做，所以我就去報讀呢個課程，o依家只要畀塊布我，我就造到件衫o架喇！」學有所成的他，最近更與當地的時裝店合作，計劃下季正式推出由他設計的時裝。

林政峰與父親林嘉華感情很好，由細到大都無所不談，七歲的他，更貼上假鬚扮爸爸，十分搞笑。