兒女在父母眼中，永遠都是最出色的。
近日名模歐陽妙芝，不時於社交網站分享幼子方玉亨（Atilla）勁跳K-POP的影片，她與老公方時俊則樂做攝影師，半夜揸車出動去貨櫃碼頭、沙灘、迪士尼等地，為兒子揸機拍片，投身YouTuber行列。
狂舞派方玉亨，原來兩歲已經和媽咪上網學跳舞，八歲正式學芭蕾舞，近年更無師自學K-Pop，自小baby fat的他，已脫胎換骨甚有Oppa味。「十歲係我最肥嘅時候，成隻大笨象咁，又肥又鈍，之後我睇K-POP，開始瘦番同學識打扮。我真係好鍾意跳舞！每日都會上網睇片，一得閒就跳，希望第時大學可以讀有關跳舞、表演或者藝術嘅學科，呢類喺外國發展可能多啲機會。」
十三歲的他一躍而起，跳得又高又遠。

方玉亨即席表演凌空一字馬，甚有台型。

訪問前，他輕輕化了一個淡妝，上鏡時顯得精神奕奕，非常專業。

一字馬

早前大埔慈山寺的兒童版《心經》MV，方玉亨已初試啼聲，負責舞蹈指導及演出的他從容不迫，揮灑自如，輕鬆完成任務。
訪問當日，媽媽妙芝、胞兄方玉丞及傭人，一起陪同方玉亨前來偏遠的迪欣湖，可見他集萬千寵愛。拍照時，媽媽更像小粉絲般為他拍照。當手機播起K-POP音樂，方玉丞的細胞充滿節奏感，身體投入地舞動，直至歌曲完結。
妙芝一邊欣賞，一邊輕聲說：「細佬真係跳得好好，我哋好鍾意睇佢跳舞，佢無學過K-POP，呢啲都係佢自己上網，由朝睇到晚學返嚟。我同佢睇音樂劇，佢會好留意舞台燈光、布置、舞步，邊段音樂個演員轉三個圈，佢全部都可以跳番出嚟。佢連好多芭蕾舞家嘅歷史都會睇埋，我以前都係跳芭蕾舞，佢同我講起，我都唔識。」
筋骨柔軟的方玉亨，輕易「劈腿」做出一字馬。八歲便開始跳芭蕾舞的他，短短五年已跳級考獲英國皇家芭蕾舞七級，且每次考試均是優秀成績。
「媽咪叫我試吓芭蕾舞，我考慮咗大半年至去學，媽咪以前都係跳芭蕾舞，佢每年聖誕都會帶我地睇《胡桃夾子》芭蕾舞劇，我都好鍾意。開始時都唔鍾意舞衣咁窄身，慢慢就慣，加上好少男仔跳，我好易做到主角。」

天生筋骨柔軟的他，拉高右腿成一字形，毫無難度。

只有十三歲的他，已快將高過178cm的媽媽歐陽妙芝，這天他們更夾好穿母子裝，好sweet！

方玉亨曾跟媽媽的好友Sunny Wong學跳舞，在學校的大滙演上當上主角演出。

Sunny Wong好錫方玉亨兩兄弟，兒時親教他們跳舞，又常見面聚餐。