葉劉淑儀：培養年輕政治人才

在回歸前後擔任過不同大小官職同公職的新民黨主席葉劉淑儀（Regina），續與陸叔重溫當年任職高官時的點點滴滴、及其曾經執行過之港府政策。

陸：Regina，講返你初入政府三個月就話唔做，你上司麥高樂有無挽留你呢？
葉：陸叔，之前提過佢好睇得起我，但如果我辭職嘅消息傳咗出去，佢可能畀人覺得堂堂政務官主管，帶一個新人咁短時間就話唔掂，可能會覺得好無面，所以叫我再考慮下。後來知道我仲未有打算，就叫我留低繼續做，我估嗰次佢應該唔多高興，兼覺得我唔識得人情世故。
陸：所以面子呢樣嘢係無分國籍嘅，哈哈！你做政府工咁耐，做得最開心嘅係邊個部門呢？
葉：曾經做過民政處主任，做咗三年之後就調咗去新界民政處跟鍾逸傑爵士，嗰陣做得好開心，加上自己成熟咗同街坊相處亦唔會得罪人，麥理浩訪京之後我知道香港將要還返畀中國，英國人更打算還政於民，同時我亦接到新嘅任務。
陸：咁講下你當時嘅新任務係咩？
葉：嗰陣港英政府開始搞區議會選舉，我就被委派做首席助理政務司負責區選改制，即係擴大選民資格，免差餉等制度改革。後來麥理浩仲特登寫信表揚我，之後我又被派去做保安科。
陸：當年保安科應該未試過有女性做到咁高職位，而且仲係華人？
葉：黎慶寧曾經係首位華人助理保安司，首席助理保安司就真係從未有過女性，當年保安司謝法新覺得唔可以無本地官員嘅幫忙，佢想知外面嘅民情、邊度有機會發生騷亂等嘅問題，於是就揀咗識講廣東話嘅我。

葉劉淑儀曾於政府多個部門工作，離開政府後參選立法會議員，她同意現時立法會需要年輕化。

陸：一九八三年戴卓爾夫人訪京跌倒，無耐就開始中英談判，你當時又係負責邊個政府部門呢？
葉：嗰陣每個政府部門都要負責提供資料畀英國嘅談判代表。當時英方代表包括尤德爵士，有時會帶埋我哋出席中英談判會議，我哋係經歷咗好耐嘅洽談，先會有當年咁詳盡嘅《中英聯合聲明》同《基本法》。
陸：即係話你喺保安科就已經為港英政府做咗好多關於中英銜接嘅工作？
葉：喺機緣巧合下我收到來自倫敦嘅電報，當年英國官員已經有措施企圖落閘唔畀華人去當地居留，因為港人無英國居留權，我哋就安排咗o依家嘅英國國民（海外）護照即係BNO，香港亦正式進入去殖民地化嘅階段。
陸：咁中英談判之後你又去咗邊個部門？
葉：做完中英談判之後，政府獎勵送我去史丹福（Stanford University）讀工商管理碩士，返嚟後就得到關佩英嘅推薦，出任助理貿易處處長負責同歐共體（現為歐盟）洽談紡織品嘅限額，希望為港增加多啲額度，喺嗰度又做多三年，但已經再無位可以畀我升職。
陸：因為咁你就另謀高就？
葉：嗰時爆發六四，個個人心惶惶，好多人爭相移民，當時好多領事館或者銀行為咗吸引高管留喺香港，無條件向佢哋派發護照，我哋自然都要求英國咁做。當時行政處處長嘅曾蔭權認為我熟悉英國國籍法，就揾咗我一齊處理居英權，大約一年多就搞掂，之後再調去做副工商司。
陸：Regina，你其實喺政府真係做過好多唔同嘅崗位，之後你出任入境處處長同埋保安局局長，任內有無咩難忘嘅回憶呢？
葉：當時出任入境處處長嘅時候，條件係要我放棄英國護照，我覺得無所謂。當時香港即將回歸中國，政府希望所有公務員可以全體過渡，回歸後，換套制服就轉咗去做特區政府嘅入境處處長，跟着無耐又轉咗去做保安局局長。
陸：我知道你做咗保安局局長幾年之後又去咗讀書，係咪讀完書返嚟就成立匯賢致富呢？
葉：未畢業我就已經喺史丹福成立年輕致富，畢咗業返嚟香港後先開辦匯賢致富，無奈當時特區政府根本無意思去發展科技，我希望做啲嘢可以幫手推動科技發展。
陸：據我所知你返嚟香港之後係有去選立法會議員，因為咁你就成立咗新民黨？
葉：我一○年以匯賢致富去參選，不過無當選，仲畀個外國人鬧話我應該以政黨身份參選，深思熟慮之後就開始籌組新民黨，仲正式以黨嘅名義再去參選。
陸：對於今年立法會嘅選舉，好多年輕人都認為立法會應該年輕化，你有咩睇法呢？
葉：我同意立法會要年輕化，培養年輕嘅政治人才係一件好事，不過都要視乎選到咩人入立法會，太激進又成日拉布嘅就可能仲衰過依家。
陸：我同意香港需要唔同嘅人才支持、同互動先可以促進社會嘅繁榮同安定，人才年輕化可以穩定人力資源嘅補給，對帶動社會進步亦應該會幫助唔少。

＊葉劉淑儀已報名參選今年立法會港島區地方選舉，截至七月二十三日，同區已經報名的參選對手名單包括熱血公民鄭錦滿、民主黨許智峰、工聯會郭偉強、民建聯張國鈞、香港眾志羅冠聰、司馬文、王維基及公民黨陳淑莊。