唐麗球跟乖女做個friend
八四年選港姐得季軍入行的唐麗球（波波），〇三年跟拍拖十年的藝人吳毅將結婚，同年誕下一女梓希（Janelle），自此退出娛圈在家相夫教子，做個全職媽咪。
與現年十二歲、剛升上中一的女兒相處，波波坦言自己向來較好相與，覺得跟個女做個friend，會較凡事規行矩步更有效，「我唔會用教佢嘅方法，要佢咁樣咁樣；反而會用多啲古仔、實證、經驗同佢傾，咁佢就會聽入耳，變咗大家好似朋友咁囉！」
媽咪寬鬆，好在另有爸爸填補，吳毅將在女兒心目中是個嚴父，波波說：「男人成日覺得，女仔更加唔可以畀人蝦，要be strong，be tough，想佢快啲獨立，所以咪嚴啲囉！」兩公婆連教女都一凹一凸，難怪婚後十二年，一直恩愛如昔！
波波與十二歲女兒梓希的相處，大家儼如朋友般，最重視互相溝通。
全職湊女
唐麗球（波波）當上媽咪之前，公認是個大懵大頭蝦的人，朋友更曾笑言，擔心她有日帶BB出街，會忘記帶回家。不過，女人的母性，原來可以讓一個人徹底改變，事實證明女兒出世以後，波波不僅學懂照顧別人，更較從前思慮周詳，是個完全稱職的媽咪。
自誕下女兒梓希（Janelle）後，波波自此退出娛樂圈，全職湊女，轉眼女兒今年經已十二歲，並升讀中一。如何幫女兒選校？她直言較其他家長隨緣，不想女兒讀書有太大壓力。
爸爸吳毅將經常要返國內拍劇開工，波波形容他雖然對女兒管教嚴厲，但其實錫女錫到濃。
選校尚且如此，何況是課外培育呢？梓希是滾軸溜冰高手，但現在轉而專注於打乒乓球；學習鋼琴丟低已久，直至近兩年自己提出想再學琴，媽咪也由得女兒自己決定。波波解釋：「逼佢學冇用嘅，佢自己唔鍾意盞嘥錢，仲嘥我啲時間跟出跟入做﹃跟得媽咪﹄。如果佢自己提出話要學，就爭好遠，一定有心機好多。」
