奇葩兄弟 張崇基 張崇德
於香港樂壇來說，張崇基（Andrew）和張崇德（Peter）兩兄弟算是一個奇葩。
打從他們參加新秀計起，入行至今已廿二年，但說他們是藝人嗎？實情哥哥Andrew本身有其滑水學校，是個滑水教練；細佬Peter則有自己的音樂教室和音樂製作公司，更是位神學博士。「我哋本身真係唔係做呢行，咁多年嚟，每次做完一啲宣傳，我哋就會消失（幕前）。」他們異口同聲說。
奇就奇在，將於十月中在伊館舉行的「基會難德」，已是他們十三年來第八個演唱會，比很多當紅藝人開得還要密。「咁覺得係時候，咪做囉。」Andrew聳聳肩道。
人家開騷總有新歌或新碟配合，又或是總有些深入民心的hit歌，但他們呢，「真正大碟，八年冇出過，我哋最hit嗰隻，都仲係〈龍珠〉同〈認錯〉，問你驚唔驚？」Peter得戚地說。
要是你認為，他們沒有新歌新碟配合開的演唱會，應該只會唱唱民歌，或是福音歌，那又大錯特錯。「其實我哋只係喺第一次演唱會度，唱過一首〈陌上歸人〉，就冇唱過民歌。」Peter澄清。「福音歌，一個演唱會廿幾三十首歌，我哋只係唱兩首，十個percent都冇，唔算好過分啫！」Andrew又在旁附和。
那到底他們的演唱會有甚麼吸引力，可以繼續係咁開呢？「簡單嚟講，你哋夠膽就嚟睇！如果我哋真係你哋諗嗰啲，我哋回水畀你哋都得呀！哈哈！」兩兄弟一副挑機口脗地說。
連宣傳自己演唱會都寸嘴成咁，不是奇葩是甚麼？
殺出新血路
張崇基、張崇德雖則入行至今廿二年，但實情他們只簽過唱片公司不夠十年，〇一年開始，無論是出碟，或是開演唱會，都是自己出錢、自己製作，算是香港獨立組合始祖。
樹大好遮蔭不是不好，只是，他們更明白，香港樂壇的潛規則。「好多年前，我哋已經明白，做歌手係要等。點解唱片公司一定要投放資源畀你先？佢哋係畀錢嗰個，係有權選擇邊個歌手，可以令佢哋搵番啲錢返嚟o架喎！你唔可以逼人哋對自己有信心！咁既然我哋對自己有信心，咪惟有自己做（自資和自家製作）囉！」細佬Peter如是說。
雖然開第八次騷，但Peter仍然會親自到別人的店舖黏宣傳海報。
做獨立組合是他們當年惟一的選擇，能夠堅持到今天，對他們來說，總算殺出了一條新血路。「我哋想畀人知，樂壇可以行嘅formula唔係淨係得一條！」Peter說。「其實我都好proud of我哋所出嘅唱片，同做嘅演唱會，咁多年嚟，我哋都build up到個票房同口碑，啲人都係有讚冇彈，連我哋自己都好滿意！」Andrew謂。
最重要是，他們自資的唱片和演唱會，全部都有錢賺，從未蝕過。
