浪人情歌 潘源良
填詞人、編劇、導演、講波佬，潘源良縱使身份多多，但一直以來，他的「浪子」形象還是最深入民心。而事實上，他這個人也的確很信機緣，例如九九年，他忽然跳到幕前在有線電視講波。「咁啱得咁蹺咋嘛。佢哋買多咗好多聯賽返嚟直播，要人講，問我有冇興趣，咁啱我嗰段時間又冇乜詞填，又對足球有興趣，咪入去做囉。」
又例如八六年執導完處女作《戀愛季節》後，相隔廿五年才有第二部作品《出軌的女人》。「開戲唔係咁容易，好講機緣係咪夾得到。所以我成日都『有啲嘢』喺袋，萬一有老細突然間話想開套戲，我都有嘢答人嘛，o依家我都有幾個劇本傾緊o架。」
再例如，他填詞三十多年來明明作品已近千首，但偏偏到今天，才舉行一個作品show「最愛潘源良是誰作品展」。「之前有人搵過我傾o架，不過我唔想搞到好似懷舊音樂會咁，有乜癮啫？o依家傾到可以唔係咁，咪做囉。」
大概就是因為潘源良有這樣的耐性，所以才能等足李麗珍廿一年再續情緣，傳說中當年他為了這段婚外情所寫的〈最愛是誰〉，今天已有了個很浪漫的答案。「嗯……呢個……嗯……」
但見我眼前這位五十五歲、本來表現得懶cool的浪子忽然紅都臉晒。
最愛是誰
潘源良和李麗珍○七年再續情緣，外界都說男的夠癡心，更有說當年他寫給林子祥的〈最愛是誰〉，一句「別了她，原為了你，留住愛，亦留住罪……」正正就是他對這段婚外情的寫照。
「嗯……呢個其實係……嗯……」他靦腆地支支吾吾。「我記憶中，時間上其實唔係好夾，因為〈最愛是誰〉係《最愛》嗰套戲嘅主題曲，拍《最愛》嗰陣，的確係啱啱識阿珍、啱啱拍緊《戀愛季節》，但如果識production嘅人就會明白，點會拍完套戲（《最愛》）先做隻主題曲啫？」吓？如此說來，這個多年來的浪漫傳聞完全被破滅了！「咁如果大家覺得呢件事係浪漫嘅，咪當係真囉；你可以話我寫嗰啲詞係我嘅潛意識，咁我已經冇得解釋啦，啱唔啱呀？」
跟珍妹再續情緣，外界都說是才子佳人的配搭，至今二人感情穩定。
還記得年前珍妹也曾公開讚他是個浪漫的人，那到底有幾浪漫呢？「嘩！呢啲嘢，我唔會宣之於口啦，啱唔啱呀？哈哈哈！」那包括向她求婚嗎？「其實結唔結婚有乜所謂呢？我都五十幾，就嚟『登陸』（六十歲）啦，仲講呢啲嘢？最緊要大家o依家相處得開心啫，啱唔啱呀？
「同埋成件事最浪漫，係我哋中間嗰廿年，喺某啲場合on and off有見過面，但就冇聯絡、冇約出嚟，結果都喺番埋一齊，呢吓你先吹我唔脹呀嘛！啱唔啱呀？哈哈哈！」珍妹看到他這句話，應該會冧到爆吧！
