談藝術，你可能會說：「我識條鐵咩！」
查實藝術，含意甚廣，可以是普及如歌曲、電影，別太快定下框框，所以如王菀之（Ivana）及導演葉念琛，都是藝術家。
這個「藝術組合」，六年間四度合作，於新作《阿索的故事》中，王菀之由「阿寶」變成「阿索」，告訴你一個普通中女的故事，淺白過一條鐵。「角色係一個好普通嘅女仔，冇超能力，事業、愛情，咩都盡力做到最好，但係未必有相等嘅回報。」
大腦葉念琛則表示：「葉念琛嘅電影，以前可能只係關於愛情，今次我想再貼地啲、突破啲，加埋親情同其他元素落去。我嘅戲最大特色就係，將現實最殘酷嘅一面，赤裸裸咁表現出嚟。做人，要去到谷底，先會拋棄所有嘢重生。」
貼地，網友的演繹是MK，其實也是一門藝術。

 

現實的殘酷

四十五歲的葉念琛，執導過近三十部電影，即將上映的《阿索的故事》，是其「導路」的一項突破。「我最拿手係拍啲背叛、搶人男朋友嘅戲，呢啲係現實中會發生嘅事，今次都有呢啲暗黑面；o依家年紀大咗，覺得家人都好重要，我同嫲嫲嘅關係好親密，佢走咗好多年，所以部戲入面，一啲『阿索』同婆婆嘅情節，其實係我嘅情感投射。」
對於女主角王菀之來說，要飾演巴士車長，同樣是其事業的一大考驗。「我應承導演，一定要考到個巴士牌，我考唔到個牌，部戲就會一路咁delay，於是俾咗啲壓力自己。揸巴士對我嚟講，係興奮多過驚，我係『賽車手底』，十六、七歲喺加拿大已經考咗車牌，係enjoy揸車嘅，不過喺香港就冇乜點揸。
「最終考咗兩次先pass，一考完見到分紙嘅時候，我就開心到流淚，因為成功感真係好大。」
以女巴士車長為主角設定，葉念琛是別有用心的，「因為『阿索』受到打擊，冇咗愛情、冇咗事業，俾好朋友、男朋友出賣，令佢對人性冇咗信任。而揸巴士，就代表佢重新掌管自己嘅人生。」
戲要拍出現實的殘酷，但現實中的葉念琛，則不必時刻維護「殘酷」形象，如訪問這天，他特別穿上全新的波鞋現身，最緊要夠潮。

除了愛情，葉念琛稱新作不止圍繞愛情，親情也是重要一環，為自己的一項突破。

都是Family

二人四度合作，葉念琛坦言，一向有自己的班底。「我好少同一個演員只合作一次，我同Ivana時不時都有合作。葉念琛係有一個family嘅，好似阿Bob咁，如果我開戲冇佢，佢會嬲o架！佢一知道我開戲，就會打嚟叫我預埋佢o架嘞。
「喺拍攝現場，我都係有商有量嘅，我希望我嘅拍攝氣氛，都係好開心嘅，雖然劇本係我寫嘅，喺現場又係我導演，落場前我已經知道自己要啲乜，但我都會俾演員自己發揮吓。」
葉念琛說着，在旁的王菀之，愈聽笑容愈見燦爛，她解釋：「導演一講，我啲回憶返晒嚟！之前我哋拍嘅都係喜劇，現場係好好笑、好好玩嘅，好似拍《我的情敵女婿》一場賭戲，我同嘉玲姐、四哥同場，拍得好開心，我要好努力先可以忍到笑。
「相比之下，今次喊好多，因為部戲係生活上嘅故事，每條線都要做好多功課、投放好多感情。」

王菀之跟葉念琛早於一四年的《Delete愛人》便開始合作，二人表示，每次合作也想予人耳目一新的感覺。