I am what I am 側田
同一間酒店，同樣嘅體驗，但係，兩個唔同嘅側田。
兩年前，同樣在這家酒店的房間，跟側田做個唱宣傳專訪，那天的他，無論談及任何話題，也彷彿不吐不快，表現得有點激動。但這天，他即使說話依然坦白，但笑容多了，幽默感也多了。
「係開朗咗o架，但我個人依然好moody，呢樣嘢我天生就係咁，改唔到，不過可能離開過一吓（香港），唞過氣，（心情）係會好啲嘅。」
一○年底，他舉行大型記招宣布撤離香港，移師北京發展，外界有說他是因為經過了○五年出道時的事業高峰後，負面新聞不絕，唔走唔得；一三年他回來開個唱，又有說他因為在北京撈唔掂；去年他回港了，既被爆出他帶兩女到私竇，又有報道指他因為冇嘢撈、搣老本，霉到要由貝沙灣豪宅搬到鴨脷洲住唐樓，生活潦倒坎坷。
「其實啱啱嗰一年，我都已經匿埋咗，已經冇新聞價值，做乜仲要成日擺我上封面呢？」他聳聳肩，苦笑。
大概，經常這樣被傳媒「針對」，多少也跟他說話太直有關吧。「我只不過係opinionated（堅持己見）咋嘛，每個人都會有自己嘅opiniono架啦，呢樣嘢冇話錯o架，我又冇攻擊你（傳媒），但如果我咁樣都得罪咗你，呢個係你嘅問題啦！
「我係咁（說話直腸直肚）o架啦！」
側田就是個如此不會掩飾自己的人，到底這樣會令外界認為他是坦白得可愛，還是乞人憎呢？他查實已經doesn't care了！
JustinLo - feeling obscure #受害症
○五年出道的側田，自○六年初被偷拍到與林苑同居後，多年來有關他的新聞，幾乎有八至九成都是負面的。在兩年前，他跟我那個「不吐不快」的專訪中，便曾經表示「好驚香港傳媒」。「吓？點解要驚呀？」你自己講o架嘛。「驚香港傳媒？驚乜嘢先？其實，我講嚟講去，都係某一間啫。」
據他自己分析，他跟「某一間」傳媒的積怨，始於○六年，他一位做音樂幕後的uncle訪問。「嗰陣佢哋同我uncle做完專訪之後，就摷晒佢離婚、打官司啲屎出嚟講，我咪嬲囉；到我再見到啲記者時，我就話：『邊個（記者）係邊間（某一間傳媒）嘅，我唔做（訪問）。』嗰日之後，就全世界唔妥我，我有乜嘢都寫我唔好，就算我冇做錯，都係寫我唔好，有啲（報道）直情我唔係嗰個主角，都要擺咗我喺裏面做主角。
雖然側田出道初期，曾與楊千嬅傳過緋聞，但二人至今仍是好朋友，早前千嬅更送上超人底褲賀他開個唱。
「啱啱嗰一年，我都已經匿埋咗，但唔知點解我依然會畀人成日擺上封面o架喎，啲報道話我『撈唔掂』、『唔紅』、『冇新聞價值』，咁你做乜寫我啫？leave me alone！跟住又話我，乜嘢『妄想受害症』——我諗我係有少少嘅，因為我個人係defensive，但otherwise佢哋咁樣寫我，我係受緊害喎，咁我係咪妄想緊呢？不如你淨係話我有受害症啦！我冇妄想呀！總之佢話個蘋果係藍色嘅，就係藍色，乜都佢哋講晒！」
