近年電視罕見有類似《衝線》嘅青春勵志劇集，我欣賞創意，當然要支持。所以今晚「Paco巨星飯堂」就特別邀請劇中其中兩位男女主角，沈震軒（Sammy）同蔡思貝擔任嘉賓，暢談拍攝劇集時嘅趣事。兩位嘉賓因合作而成為好友，友情比一傳即逝嘅緋聞，自然更加珍貴。我就帶佢哋去位於尖沙咀嘅「目利きの銀次」，以具沖繩特色嘅美食，慰勞兩位「衝線健兒」！

我帶Sammy同思貝去到位於尖沙咀嘅「銀次」，一邊歎沖繩美食一邊暢談《衝線》。

鏡頭背後

我一向欣賞Sammy，今次佢為咗呢部青春劇，特別剃去man爆嘅鬍鬚，以青靚白淨樣示人。「因為我對劇集有一定嘅期望，好耐都冇啲風格咁清新嘅劇集，而且又以近年年輕人流行嘅單車為題材，我覺得有新鮮感得嚟亦都好有吸引力。我留鬚個樣太成熟，唔係好襯套劇，剃咗會合理啲。有啲fans講笑話，我剃咗鬚個樣後生10年。」

青春劇種近期確實少見，應該支持。

哈哈哈！我都覺得Sammy望落去年輕咗好多，同24歲嘅思貝好似差唔多，可能因而傳出緋聞，Sammy淡然表示：「咁證明我哋有新聞價值囉，我都成日同思貝講，食得鹹魚抵得渴，呢啲係一個package。」

思貝大表贊同：「雖然喺劇集入面，我同Sammy同阿謙（羅仲謙）都有感情線，佢哋又好似好cool咁，但喺鏡頭後，佢哋都好好，教咗我好多嘢。講Sammy先，同佢合作真係好開心，唔係老土說話，因為佢好真心待人，唔係特別獻殷勤嗰啲，總之係會知道佢係靠得住嘅。」

辛辣吞拿魚卷（$74），最啱佐酒！

牛油燒原隻北海道帶子（$158），鮮味！

仲買人精選特上刺身盛拼盤（$395），係每日新鮮運到嘅精選。

陶醉台景

思貝話，反而同阿謙喺合作前後，發生一段小插曲。「喺知道要拍呢套劇，開工前幾日，我真係喺街撞到阿謙，當時我完全唔識佢，於是諗住同佢say個hi打聲招呼。點知佢完全唔理我，直行直過，嗰時我覺得佢好寸o架。

「後來開工熟咗，我問番佢呢件事，佢就勁唔好意思同我講，佢大近視冇戴眼鏡，咁我都唔會『追究』嘅，哈哈！」

Sammy同思貝因拍劇而成為好友，絕唔會因「緋聞」而令友情變質。

除咗阿謙同Sammy，思貝話Hanjin（中）都教咗佢唔少嘢。

思貝係新世代中具有潛質嘅一群，我寄語佢把握每個機會。

劇組喺台灣取景，Sammy同思貝都對當地嘅人、景讚口不絕。思貝話：「台灣嘅劇務好nice，而且仲好細心，我哋出外景嘅時候，成日打風落雨，但係我哋要演夏天戲，所以都好凍吓，一停機佢哋都會自動幫我哋擔遮，又畀自己件褸我哋着，真係好貼心。」

Sammy就欣賞靚景：「其中一場戲講我同阿謙私片，喺台灣公路最高嘅地方武嶺賽單車。我問過啲鍾意踩單車嘅朋友，佢哋話武嶺就好似《頭文字D》嘅秋名山咁，我去到就覺得嗰度好靚，而工作人員又用航拍，拍出嚟仲多咗一份速度感。」

海膽汁燒蠔（$98），係味覺嘅享受。

三文魚三文魚子飯糰（$84），落足料炮製！

明太子煎蛋卷（$78），層次豐富！

澳洲牛柳鹽燒（$168），juicy！

北海道產喜之次一夜乾（$148），惹味！

甜品蒸紅豆餅（$48），夠煙韌。

目利きの銀次

地址：尖沙咀彌敦道100號The ONE UG層220-221號舖

電話：2703 9333