好戲連場
今晚嘅「Paco巨星飯堂」陣容鼎盛，我誠邀一眾主演舞台劇《嬉春酒店》嘅演員，包括嘉華哥林嘉華、江美儀、梁嘉琪、李思欣、譚凱琪（Zoie）、李綺雯（o靚妹）同埋劉凱欣。當中不乏舞台劇初哥，但係佢哋齊心為好戲，真心交流，絕無年資輩份之分。
既然要暢談好戲背後嘅努力，我就帶7位貴賓去到位於千禧新世界香港酒店嘅「嵯峨野」，品嘗住精緻嘅日本料理慢慢傾。
今晚我帶美儀、嘉華哥（前排左至右）、嘉琪、思欣、Zoie、o靚妹及凱欣（後排左至右），一眾《嬉春酒店》演員去到「嵯峨野」品嘗特色日本料理。
好乸搞笑
嘉華哥同美儀相識多年，今日美儀就細說同拍檔嘅淵源：「嘉華哥讀書嘅時候，喺我姑丈屋企補習英文，我見過佢。不過，入行之後就未同佢合作過，今次我奉獻咗兩個第一次：第一次演舞台劇，同埋第一次同嘉華哥演夫妻。之不過第一次合作，我就要出軌囉。」
美儀話畢，嘉華哥立即補充：「我喺個劇入面嘅角色係比較木訥嘅，所以就冷落咗美儀飾演嘅嬌妻，個太太想同丈夫親熱吓，佢就只係識叫個老婆洗衫煮飯。呢種咁不解溫柔嘅丈夫，同我一啲都唔似！」
美儀同嘉華哥喺劇中飾演夫婦，現正努力排練。
哈哈哈！嘉華哥同太太劉寶珍結婚30載，依舊如膠似漆，的確同佢喺舞台劇中嘅角色完全唔同。「今次有美儀同伍姑娘（伍詠薇）兩位『好乸』，兩位一樣咁好戲咁搞笑，加埋就係『好乸』搞笑，搞到我同豹哥（單立文）兩隻『好公』都唔敢怠慢。」
o依家佢哋每日都排練得如火如荼，美儀呢位「好乸」仲自度一場「黑絲」戲，將角色更加立體化。「係我建議加嘅，因為我覺得要說服觀眾點解豹哥會揀同我去爆房，反而唔同飾演佢老婆嘅伍姑娘。咁呢一部係喜劇嚟嘅，我想誇大佢，突出我畀到豹哥一種官能刺激。」
新鮮腐皮伴海膽（$280）帶出海膽另一面。
醋拌生蠔（$900）選用北海道生蠔炮製，配上自家製酸汁，更見特色。
雜錦刺身拼盤（$900）選用海膽、牡丹蝦、吞拿魚腩等上等食材製作，款款新鮮。
四位一體
咁刺激嘅部分要適可而止，搞笑係呢部舞台劇另一特色，呢部分仲有梁嘉琪等演員分擔。「我喺舞台劇入面係嬉春酒店嘅服務員，同泰臣一齊搞笑，亦都喺4個主角嘅關係入面起到一啲變化嘅作用。」
呢部舞台劇嘅陣容鼎盛，仲有實力派艾威，而思欣、Zoie、o靚妹同凱欣就分別飾演佢嘅囡囡「梅蘭菊竹」，思欣話：「我哋4個喺劇入面係行動一致，四位一體嘅，出入都有粵劇嘅功架，所以我哋都有特別去學。」
Zoie表示：「思欣要唱埋子喉，就算唔係好長，都要特別去學，我哋好認真o架。」o靚妹大表認同：「因為我哋嘅一舉一動都要好齊，所以排戲嘅時候，我哋都盡量去培養默契。」凱欣就話：「4個入面我嘅資歷比較淺，但係佢哋都好好咁教咗我好多嘢。」
嘉琪同美儀喺舞台劇上首次合作，擦出火花。
o靚妹、思欣、Zoie同凱欣（左至右）飾演四姊妹，喺劇中四為一體。
艾威（左一）飾演四姊妹之父，又係好戲嘅保證。
養聲蜂蜜
距離20號正式公演嘅日期愈嚟愈近，美儀就公開一套獨門養聲秘方。「養聲呢一項我係最弱嘅，因為平日我好容易就聲沙，好在最近經朋友介紹一隻蜜糖畀我，o依家我每朝起身，刷牙之前就含一口，真係好啲。」
嘉華哥就話：「我就冇特別養聲，飲吓水都OKo架嘞！不過少食熱氣嘢，都有啲用嘅。」
一眾演員已ready，我就預祝佢哋場場good show！
鐵板燒鵝肝多士（$410）加入黑醋、醬油，濃而不膩。
和牛紙火鍋（$650）選用鹿兒島A4和牛，入口即溶。
汁煮喜之次（$700）係美儀嘅心水，由餐廳總廚苗加昌彥師傅特別調製嘅醬汁炮製，鮮甜嫩滑！
茄子田樂燒（$120），選用京都茄子加上白味噌及赤味噌處理，啱晒佐酒。
日式燒響螺（$480）以原隻響螺加木魚水慢燒，100%鮮味。]
養聲蜂蜜
距離20號正式公演嘅日期愈嚟愈近，美儀就公開一套獨門養聲秘方。「養聲呢一項我係最弱嘅，因為平日我好容易就聲沙，好在最近經朋友介紹一隻蜜糖畀我，o依家我每朝起身，刷牙之前就含一口，真係好啲。」
嘉華哥就話：「我就冇特別養聲，飲吓水都OKo架嘞！不過少食熱氣嘢，都有啲用嘅。」
一眾演員已ready，我就預祝佢哋場場good show！
排練日子有功，美儀同嘉華哥漸見默契。
嵯峨野
地址：尖沙咀麼地道72號千禧新世界香港酒店1樓
電話：2313 4215
