主頁 > 專欄 > Paco巨星飯堂 > 宜聽而Sing 2018 年 03 月 18 日

黃栢高

黃栢高(Paco)，金牌經理人，叱吒樂壇三十年，炮製無數金曲，捧紅不少歌手。近年涉足電影，《行運超人》、《龍咁威》、《殺破狼》等，皆叫好叫座。最新動作，除於本刊主持《Paco巨星飯堂》，每逢周一更在《頭條日報》主持「名人會」專欄，專訪城中名人、紅星。

宜聽而Sing

女士們要選一把啱聽嘅聲音，相信當中一定會有趙學而嘅位置，多年嚟學而唱盡女人心，有一定嘅知音人。嚟緊4月尾，入行近三十年嘅佢將首次踏上紅館舞台，喺呢個歌手嘅dream stage，舉行首次個人演唱會，以歌會有心人。

今次「Paco巨星飯堂」，我就帶學而去到位於尖沙咀嘅「King Ludwig Beerhall」，品嘗傳統嘅德國菜式，細說佢嘅興奮心情。

入行近三十年嘅學而，闊別樂壇多年，今年終於踏上了歌手夢寐以求嘅紅館舞台，於4月28日舉行首個紅館個人演唱會《趙學而Right On Time演唱會2018》。

啱Timing

今次嘅紅館演唱會，學而認為timing啱啱好，俾佢將過往幾十年累積嘅經驗同感受，喺舞台上展現出嚟，佢仲預告，喺個唱上齋賣靚聲，唱出女人心聲。「我係一個唔識跳舞嘅人，個唱唔會載歌載舞開party咁，反而係不停唱我啲感性慢歌，女人對生活或感情睇法嘅歌，同Fans嚟個集體回憶！」

對於等足廿四年之久先踏上紅館舞台，學而表示：「其實早喺〇八年推出HiFi碟嘅時候，已經有人邀請過我喺紅館開演唱會，但我覺得自己未夠狀態就推咗。直至今年，我覺得自己心態輕鬆咗好多，又了解觀眾心目中嘅趙學而係點，就覺得係時候嘞。」

八八年參加新秀出身，學而演繹過無數「好女人情歌」，如〈每隔兩秒〉、〈尋開心〉、〈自欺欺人〉、〈我恨我是女人〉等，其中同王傑合唱嘅〈誰明浪子心〉，仲係K歌金曲。雖然之後佢主力演戲，但係對唱歌，學而仍然係有團火，所以〇八年先會自資推出HiFi碟。

「入行咁多年，我從來無欲望上紅館，所有嘢都處之泰然，因為我心態上未ready去做，始終太耐無唱歌。其實好多謝主辦商，佢哋由〇八年開始搵我，直至一六年我喺九展舉行咗《我趙學而演唱會》後，反應好好，網民又幫我集氣，推我上紅館，主辦商就即刻幫我入紙申請檔期，結果等咗一年才批。」

我帶學而去到位於尖沙咀嘅「King Ludwig Beerhall」，品嘗傳統嘅德國菜式，細說佢終於踏上紅館舞台嘅興奮心情。

〇八年曾獲邀於紅館開個唱，但當時學而認為自己未準備好而推卻，十年過後，佢覺得啱timing，連演唱會都以「Right On Time」作主題。

學而喺一六年舉行嘅演唱會，獲好友如靚靚等，親身撐場。

巴伐利亞煙燻肉拼盤伴德國芝士（$185、二至三位用），拼盤分別有三款由德國入口嘅煙燻肉、火腿及芝士，鹹香濃淡兼備，用作佐酒或配麵包嘅不二之選。

羅文生菜及火箭菜沙律配薄雞片伴吞拿魚醬及香草汁（$155），是新鮮又清新之選，醬汁軟滑帶少許鹹香，更添滋味。

火腿扒及煎蛋配薯餅（$140），將生薯仔刨成絲製成，薯餅兩面以慢火煎至香脆。配上煎蛋和火腿扒，更添滿足感。

會知音

人生首個紅館騷，對把聲勁有要求嘅學而，自然搵嚟重量級班底support，「音樂總監我就搵咗同我合作過Hi-Fi碟嘅何秉舜，佢好熟悉我啲歌，編曲上容易啲處理。服裝就係Tang Lai，監製係阿Mark（雷頌德），上年我喺澳門開騷，都係阿Mark做我嘅監製。個唱上我唔會勁歌熱舞，但會專心練好啲把聲唱歌。

「我有好多感性慢歌，講女人對生活或感情嘅睇法，由〈每隔兩秒〉到〈輸給戀愛的女人〉，好似講緊一個女人嘅成長咁，所以喺歌曲編排上，會打動到少女、中女等唔同年齡層，有共鳴之餘亦可以同Fans嚟個集體回憶！」

關於演唱會嘅rundown，學而就話仍在研究中，唯一可以透露嘅，就係將會有一些sidetrack歌，同埋會唱別人的歌。「你都知啦，趙學而曾經有一個朵（稱號）叫做『翻唱王』。我啱啱出道時，當時有啲當紅女歌手做人態度令我好欣賞，趁住今次個唱我揀了林憶蓮、關淑怡和王靖雯（王菲）嘅歌，大膽挑戰吓。」

至於外界最期待嘅嘉賓名單，佢就話尚在考慮中。「如果今次有嘉賓，我就希望會係特別啲，搵一啲同我喺音樂上面有合作過嘅，希望佢哋唔會托我手踭啦！」