去了美國上市嘅阿里巴巴，上個星期都算當黑啦！佢在上周四派季度業績，調整後每股收益八十一美分，高過市場預期七十四美分，但最重要的年底購物營收四十二點二億美元，差過預期的四十四點二億美元。成績表出街後，股價大插，跌咗百分之八點八，周五亦無反彈，再跌百分之○點八，收報八十九點零八美元。

小米增長迅速，同由雷軍揸旗的金山軟件，隨時可以沾到少少旺氣，有一番炒作。

阿里巴巴除咗因為業績唔好，影響股價之外，仲因為佢同國家工商總局大打口水戰，亦令投資者失去信心。因為國家工商總局之前出報告，話淘寶網上銷售產品，近三分之二係假貨，指摘阿里巴巴對賣假貨嘅商戶態度軟弱，阿里巴巴就反駁國家工商總局報道。連續受兩個壞消息打擊，所以就令股價隊咗落嚟。上周五阿里巴巴老細馬雲到訪中國總局後，大家好似傾掂數，唔知阿里巴巴股價可唔可以反彈番。

我就好有興趣比較中國三大網股：阿里巴巴、騰訊（0700）同百度走勢，睇番阿里巴巴個股價走勢圖，自從舊年九月上市之後，十一月升上一百二十元嘅高位，到上周五跌咗超過百分之二十五，另一同樣喺美國上市的大陸科網巨頭百度，同樣舊年十一月上過二百五十元高位，但到上周五就回到大約二百一十七點九元，百度回落走勢和阿里巴巴相似，只是幅度無咁深。相對起嚟，香港上市的騰訊雖然喺阿里巴巴舊年鋒芒太露時，表現相對遜色，但如今阿里巴巴唔係幾得時，騰訊近期走勢反而強。

阿里巴巴受連番打擊，近日股價急挫，較高位回落百分之二十五。

騰訊走勢　人弱佢強

你睇佢舊年跟住美國科技股炒上時，最高去到一百三十四點九元左右，只係略穿到八月高位，之後因為業績唔係咁理想，就深插到一百零四點五元，但係上個星期，一月二十七日揪返上，已經去到一百三十八元高位，如果以走勢計，佢升穿上次高位，走勢明顯比佢兩個美國上市嘅同業阿里巴巴同百度強。

固然上星期五騰訊都跟隨阿里巴巴喺美國大跌而下插，跌咗百分之一點九，收一百三十二元，但仍相對強勢。騰訊這種人弱我強的走勢，令我有少少懷疑香港資金只是輪流炒不同板塊之股票。香港科技股二○一三年炒到「㷫烚烚」，但係炒作嘅資金喺二○一四年中有相當部分資金轉去炒國企股，所以即使美國科技股大升，香港科技板塊都無表現。但到舊年底國企股、特別係金融股升得比較多時候，愈高愈難炒，近排資金有少少回流返去炒科技股嘅走勢。

騰訊上周破頂，走勢明顯較強。

騰訊呢個龍頭大股表現強勁好合理，但我哋睇番另一隻曾經炒到「㷫烚烚」嘅科技股金山軟件（3888），佢嘅走勢我覺得仲值得大家留意，佢當然無騰訊咁強啦！所以舊年四月見三十三點五元高位後，其實就一路「碌」落嚟，碌到今年一月時嘅低位十四點七八元，跟住就有少少尋到底一級級向上嘅走勢，雖然上星期五佢都跟住科技股回吐潮跌咗百分之三，收番十八點六元，但係只要佢唔再深度下跌，都仲可以維持到一個反覆向上的上升軌。金山軟件近排升浪，雖然係有消息話中國為加強網絡安全發表文件，對呢類做網絡保安公司比較有利，但我又覺得係跟勢炒的因素更重要。

近排科技股追落後，我覺得係同大市有關係，舊年十一月之後，國內減息，金融股大炒特炒，跟住A股大波浪急速向上，當時內地金融股包括證券、保險同銀行咁好炒，就無人炒科技股啦！但o依家阿爺策略係唔想個股市升得咁癲，所以個股市就由急速嘅牛市，變成一個放慢嘅牛市，咁資金就有部分由之前炒到好熱嘅股票抽番出嚟，轉行炒較落後的科技股都唔出奇，反正科技股份都係以概念行先，本來都唔係純粹得基本因素，股價落後已是很好的炒作因素。

小米上市　金山炒作

科技板塊長遠得唔得未知，但係以騰訊為主嘅科技股走勢，強於美國科網股，就可以見到有資金係炒緊佢。所以可以預計，呢類股票喺未來一、兩個月都仲繼續有啲睇頭。

如果講金山軟件，佢仲有一個附加因素，就係佢大股東雷軍。雷軍搞嘅小米，愈搞愈成功，早兩年佢聲言小米唔會咁快上市，唔想為咗照顧公司業績而放棄開拓市場，但係過去年幾，小米已經成功打開唔少市場，聽聞好多投資銀行已經想佢走去美國上市。

金山軟件近排已有追落後的勢頭，投資者可留意。

小米剛於舊年十二月底完成新一輪十一億美元融資，以四百五十億美元（約三千五百億港元）的身價，晉身全球最高估值的科技新創公司。而同為小米、facebook和阿里巴巴早期投資者的俄羅斯大亨米爾納更認為，小米擁有與後兩者一樣的潛力，沒有其他公司能像小米這樣快地達到十億美元的營業額，其增長速度史無前例，其估值可以達到一千億美元（七千八百億港元）咁話！

隨住今年小米喺美國上市機會上升，同系金山軟件都有可能會沾到少少旺氣，順住小米上市嘅熱潮可以有啲炒作。