二○一五年又開新局，睇番二○一四年，香港股市有好大變化，指數冇乜升跌，但係睇裏面的股份已經係大浪淘沙，對上一年好得的股份，好似賭業同科技股，全部唔係好掂。科技股中除騰訊（0700）外，好多二三線科技股都跌咗唔少，賭業股直頭跌到七個一皮。

去年得的主要係國企股同本地地產股，用這個邏輯去睇，去年得的股份，今年又會否再下一城？我自己睇法就係睇淡去年升得多的地產股，仍然睇好紅色股，呢個睇法同一五年經濟大勢好有關係，我不妨羅列各方面的大趨勢，將來睇睇有幾多中，幾多唔中。

近期內地樓市成交轉趨活躍，加上股價落後，令內房股在今年第一個交易日大升。

加息年地產股承壓

第一係加息年。美國經濟十分強勁，去年第三季有百分之五增長，市場估計第四季將略回吐，但繼續向好，如花旗集團就預期去年第四季增長會回落到百分之三，但到今年首季會再升到四，估計今年經濟繼續向好。美國經濟去年在聯儲局量化寬鬆加印銀紙行動停止後，仍保持強勁增長，過去三年失業率由百分之八點六，回落到現在的五點八，經濟咁強勁，難以長期維持利率在○至○點二五超低水平。估計今年加息機會相當大，可能在年中開始，加息幅度好睇當時美國經濟同外圍經濟環境，估計幅度比較溫和。

再睇目前美國市場的利率仍然好低，受環球經濟回落，各國放水和通脹放緩等因素影響，債價上升，債息下跌，美國十年期國債息率上周五只做二點一一厘，比一四年頭的三厘高位要低很多（題外話德國十年債息更低至○點四九六厘）。今年美國即使加息，估計市場利息也不會升很多。但要留意若年中開始加息，始終會對地產股及高息的公用股有壓力，特別是已高升的地產股好難再好似去年升得咁爽。

第二個觀察係通縮壓力。強如美國過去一兩年平均通脹只有百分之一點五，經濟學家預測今年美國通脹率跌到百分之一以下的機會率，高達百分之七十二，係五年以來最高。在油價急跌情況下，美國通脹壓力不高，甚至有步向通縮風險。另一方面中國物價增長亦很慢，十一月通脹率只有百分之一點三。歐洲及日本通脹亦很低，自然會激勵歐洲、日本繼續去放水，刺激股市造好，所以放水多的國家，股市仍可睇好。中國今年被迫要再放水，以免滑向通縮，保住較理想的增長，所以中國股市仍可睇好，但下半年反而要提防中國經濟數據轉好時，管理層反而會減低放水量，不過物價一日無明顯上升趨勢，放水仍會持續。

美國經濟復甦強勁，估計聯儲局主席耶倫很有機會在今年開始加息。

油價跌利運輸重工

第三，油價有繼續大插的風險。我講的係風險，因為目前油價已跌至五十三美元咁低，隨時會短線反彈，甚至見底。但你叫我估，我仲係估有四成機會跌至三十五美元的水平，主要因為美國借油價大跌狙擊俄羅斯，亦得到中東產油國支持，如今咬住北極熊唔放，近日產油大國沙地更驚死油價跌唔夠，仲講話油價跌到二十元水平都冇問題，呢啲表態都有驚油價未跌夠的味道。

若油價跌得愈急，令俄羅斯等地方出現經濟危機的機會愈大，例如出現債務違約，係可能短期衝擊環球股市的風險因素，不過估計美國已做足防風措施，對美國的衝擊不大，但如果危機突然間爆發，都會觸發市場一定調整。油價回落對中國及美國等用油國的經濟有利，是中國大量用油企業賺錢的良機，例如運輸或重工業，不利一眾新能源股，因為油價插無人想吼替代能源。當然，另一個搵錢機會，係等油價跌到盡跌到殘時，買油股、氣股、新能源股，但想咁做唔好急，因為最後一跌係最大力，最難捱。

第四係歐洲同日本經濟繼續差。其實拉濶來講歐洲、日本同中國都差，但我對歐洲比較擔心，中國應該較好。較早前希臘的選舉出了問題，國會不肯接受總統的提名，勢將重新大選，之後可能有反對緊縮政策的政府上場，令政局動盪，我有點擔心歐債危機重燃係今年一隻黑天鵝。不過德國一直反對歐洲央行大規模擴大量寬，萬一呢隻黑天鵝出現，雖然會造成市場波動，但也會促成歐洲加大放水力度，不至於係災難根源。

睇完四個估計，港股會點睇，去年明星股地產股我比較睇淡，因為股份會有周期，前年政府雙辣招打殘樓市，去年在通過法案已有些少讓步，已觸發樓市大波浪的上升，但現在已升到細價樓的環節，升完呢一浸，樓價再難無止境的上升，地產股的表現可能差少少，尤其是開始加息之後，壓力可能會加大。

油價走勢也是影響今年投資市場的關鍵因素。雖然短線或會有技術反彈，但長線再大插至三十五美元低位的機會不小。

芬佬追貨　吼內房股

至於紅色股，特別係上半年可能仲有一個浪，主要係市場估計大陸經濟愈差，政府愈要放水。我一直話內房股可以係一個追落後的類別，上周五新年後第一個交易日，內房股就爆升，主要因為內銀內險升咗咁多，內房作為一個咁大類別，阿爺要救經濟放水，內房一定受惠。只係去年底芬佬㩒住唔敢買，怕買咗衰股，萬一即插，自己就會重創，保唔住全年條數。但一過完年就見芬佬追貨，特別係追落後買內房股，可見近半年紅色股升唔少，但估值仍然便宜，所以芬佬才會買。o依家的形勢係散戶沽、基金買，未到人人皆股的危險時候，估計紅色股仲會順勢行多一浸。

大家要小心在加息之年，有經濟疲弱的通縮因素，仲有歐洲同俄羅斯可能爆煲的風險，在股市升得比較多的時候，不能排除出現黑天鵝事件，令大市急速回吐。但在歐洲、日本和中國頻頻放水之下，估計今年係水多炒作之年，本地大市總體向上。