新年無幾耐，突然就整一劑瑞士法郎大升，都可以話係二○一五年第一隻金融界的黑天鵝。上星期四下午五點半左右，瑞士央行突然發出政策聲明，宣布取消實施三年半的一歐元兌一點二瑞士法郎的上限。消息一出，瑞士法郎在十五分鐘內一路狂升，最高一度見一歐元兌零點八六三九瑞郎，大升兩成八。瑞郎突然咁升，令很多交易平台都大混亂，英國、新西蘭外匯交易商因為客戶補不到孖展傳一夜破產，滙豐網上報價仲反應唔到瑞郎走勢，畀人低價換咗瑞郎蝕晒底。

瑞士央行突然放棄掛鈎，導致瑞郎急升，瑞士股市當日一度跌近一成，收市跌百分之八點七，一日蒸發一千億瑞士法郎，差唔多等於瑞士兩大銀行瑞銀及瑞信的總市值。大家想像到好多瑞士出口品例如Swatch之類手表，都被「貨幣海嘯」衝擊到一塌糊塗。瑞士央行取消兌換上限的影響，事前應該估到十之八九，點解仲要咁做？

瑞郎狂升　反向思維

成件事起源於二○一一年年中歐債危機嚴重，歐元區經濟十分動盪，很多資金湧入瑞士避險，令瑞士法郎由一歐元兌一點三瑞士法郎，升到一歐元兌一瑞士法郎高位。瑞士央行為了瑞士法郎唔好升咁高，保護出口及阻止通縮，於二○一一年九月宣布一歐元兌一點二的瑞士法郎界限，換言之變相令瑞郎兌歐元封咗頂，然後透過央行干預，頂住瑞郎匯價唔好升過封頂價，即時令瑞郎回落。

不過，過去大半年由於歐洲經濟唔掂，出現通縮，歐元兌美元不斷回落，資金湧入瑞士避險，理論上如果無掛鈎安排，瑞士法郎應該不停咁升，不過在呢個安排下，央行惟有頂住匯價唔畀升，不斷沽瑞郎買其他歐元資產。瑞士央行的外幣資產由價值二四九零億瑞郎，大增至五二五零億瑞郎，大升超過一倍。瑞士央行不斷買入歐元資產行動，令他們面對風險不斷提升，預計本周二（二十日）歐洲央行議息，好大機會加碼量寬，歐元可能進一步走弱，資金再湧入瑞士，瑞士央行都好難頂，惟有大膽拆走瑞郎同歐元的掛鈎，任由瑞郎升值。

貨幣是一個重要投資工具，瑞郎咁樣大幅升值，真的可以令人賺大錢或蝕大本。呢次瑞郎風暴除了令外匯公司因客戶走路輸爆倉之外，亦令大量沽空瑞郎的對沖基金，輸到雞毛鴨血。截至對上一個星期，投機商持有的瑞郎淨空倉是自二○一三年六月以來最多，對沖基金及其他投機商持有二萬五千張瑞郎空倉合約，每張值十二點五萬瑞郎，瑞郎突然大升，令很多揸空倉的投資者，至少損失兩成空倉總值先可平倉。我估好多揸空倉的對沖基金，可能被人打爆倉玩完。

講咗咁多，可能你就會問，如果我又無買外匯，亦無炒瑞郎，亦唔買勞力士，瑞郎升跌同我無關，有咩投資機會先？平情而論，瑞郎呢個風暴的確係同香港人關係唔係太大，但我從此事件又領悟到一個原理，瑞郎作為二○一五年第一隻貨幣黑天鵝，好多事件都唔一定永遠好似預期咁發展，咁用一個反向思維，出現黑天鵝時，會唔會有投資機會呢？

我即刻想起另一隻貨幣俄羅斯盧布，因為盧布不是流通性貨幣，無乜人炒，但油價大跌令盧布及俄羅斯股票大幅下跌，又會唔會有搵食之機呢？我的概念是反向思維，所有事情走到極端，都會回頭，瑞郎唔畀佢升終於頂唔住，盧布和俄羅斯股票如「自由落體」那樣下墮，跌到某一個點時，部分投資產品都跌到清盤死亡，一沉而永遠不起，但以俄羅斯咁大國家來講，可以債務違約，但國家不至於就此玩完。

瑞士法郎宣布與歐元脫鈎後狂升，令瑞士的手表有加價壓力。

俄股狂跌　靜候時機

其實俄羅斯股票去年真係跌到七個一皮，以美國的交易所上市基金（ETFS）為例，去年最差一隻就是俄羅斯指數基金，叫Market Vectors Russia，去年跌咗百分之四十四點六，跌幅比油股氣股基金例如SPDR Oil & Gas E&P基金更多，那隻基金只跌了百分之廿八點八。主要原因是俄羅斯股票基金經歷雙重下跌，首先俄羅斯能源經濟咁差，股票大跌，再加上俄羅斯盧布大跌，股票換番美金時候，再跌一浸，才會跌咁多。我的理念是，呢啲基金跌咁多，如果再跌到七個一皮，黑天鵝飛晒出來時，係咪可以留意下呢？

呢隻Market Vectors Russia基金係追蹤俄羅斯股市指數Market Vectors Russia Index，既然是指數基金，投資比較分散，不會集中一個行業，風險亦分散少少。基金上周五收市得番十五點一四美元。佢過去曾經好威，睇番○八年五月時候，隻基金一度高見五十八美元，跟住一插至○九年一月十點三四美元低位，其實呢個同油價在○八年中升到一百四十七美金高位，跟着在○九年插到三十五元美金低位有關。近年俄羅斯股市指數比油價弱，但大體上都跟油價的方向。o依家隻基金有十五美元，如果俄羅斯再爆大鑊，例如債務違約，佢去到好低低位，例如去到十二、三美元，我覺得可以開始買下，唔使一注買晒，由十三蚊開始買，愈低愈買，分幾次累積。但我又好難相信油價長跌不起，不信佢長期維持在三、四十蚊美金的低位，o依家可能向下沉底，但始終會上番七、八十蚊水平。如果係咁，呢隻基金插到阿媽都唔認得後，就會反彈，唔望佢去番○八年五十九點五八高位，但一兩年升番到三十蚊樓上，機會都唔細。

記住千祈唔好見乜嘢跌都去不斷撈，要分析投資對象會否一沉不起，有啲股票即使係大股，如果佢大勢已去，跌到咁上下仲去撈，佢分分鐘再深跌落去。過去大家買電盈（0008），就係類似咁嘅例子，主要原因是香港電訊業由壟斷走向開放，電訊業二千年後已變成低回報格局，成隻股性質變晒。但係我們睇番俄羅斯，佢經濟比較單一，成也油價，敗也油價，暫時睇唔到石油長線的需求會消失晒，所以當油價跌到咁低，俄羅斯同時經歷經濟轉差同匯價下跌時，就出係黑天鵝隨街走的時代，有否極泰來的機會。所以大家如果唔怕煩，開個美股戶口，當呢隻俄羅斯基金插得好深時，唔好賭身家，買少少放幾年，我相信會有不俗回報。