泛民各有盤算 上海行散修修
立法會議員上周末上咗上海訪問，戲肉當然係泛民同阿爺就政改拗手瓜，唔少港人都引頸以待。不過，同出發前喺香港各自扭擰一樣，泛民完全冇統一策略，成盤散沙咁﹗
其實由梁振英宣布拉隊訪滬後，泛民已經表現得進退失據。一時話去，一時又話唔去，話去之後指明要見王光亞、李飛，一個轉身又話冇得單獨見面就唔肯去，左扭右扭多番拉鋸至肯出發，令唔少政界中人側目。
反而被視為激進派嘅長毛最爽快，第一個報名，但講明會玩嘢。佢出發前特意換上「天安門母親」T恤至上機，又講明行李中有六四物品，擺明通水畀阿爺，泛民諸君冇理由聞唔到燶味。
其實出發前，身為飯盒會召集人嘅民協馮檢基講過，話假如長毛出事，大部分泛民都會離團返港，但當長毛喺上海因為唔肯丟棄六四物品而被拒入境後，成班人就顯得手足無措，要喺機場圍埋開緊急會議。商議良久，最終大家決定留低，而工黨兩名議員就決定返港。當初馮檢基所講嘅共識，唔知去咗邊？
泛民議員出發前仲好似好團結咁，點知最尾都係散修修。
喺上海，泛民都係各有各做。一早講明唔參與探訪行程嘅民主黨，全程唔見人，去到傾政改一刻先蒲頭；相反獨立議員莫乃光、李國麟等，就參加咗大部分行程。
最吊詭都係公民黨，一個黨竟然有三種取態：湯家驊全程跟大隊、郭家麒同郭榮鏗唔返香港又唔跟團，黨魁梁家傑又拒絕北上，究竟公民黨內部搞邊科？
有泛民中人拆局，話各黨其實都達到各自的盤算：民主黨唔想重蹈一○年將政改攬上身的覆轍，只派出單仲偕同黃碧雲等非頭面人物出席，並且低調行事；工黨一向唔想似社民連咁激，但又覺得民主黨太溫吞，所以決定出席，但一出事就擺姿態第一個走先；公民黨繼續做雙面人，既唔想政改拉倒，但又不想太溫和，結果就搞出兩頭唔到岸嘅尷尬局面。
泛民未同中央正式埋牙已經散修修，他日埋身肉搏，唔知又會變成點？
