激進派玩AV仁 逼辭職搞公投
民主黨何俊仁﹙圖﹚二月尾趁財爺宣讀財政預算案期間,竟然喺議事廳用平板電腦睇艷照,事件過咗個多月,仍然有人咬住唔放。有民主黨人士指,激進民主派近月不斷叫何俊仁不如趁機辭職引發公投,畀市民就政改表態。
該人士話,仁哥今次老貓燒鬚,最重要係輸咗道德高地。佢舉例指,萬一仁哥拉隊遊行,爭取平反六四、釋放劉曉波,但只要有人走出嚟指住佢鬧「AV仁」,整件事道德感即刻輸晒。
睇返過往,就算李永達有婚外情、甘乃威嘅「王麗珠事件」等,都鬧出唔少風波,不過感覺上冇今次只係睇幾張相咁傷,可能同仁哥形象一向正氣,今次反差太大有關。
嗜血傳媒亦唔放過佢,有傳媒寫政治花絮放棄一貫用開嘅「鐵頭仁」,改用「AV仁」,令佢負面形象更加入屋。
激進派近日主動「獻計」,建議仁哥不如趁機辭職引發公投,既可以幫民主黨為一○年走入中聯辦談判「洗底」,又可以解讀為為自己犯錯負責,一舉兩得。激進派呢招都幾毒,以何俊仁現時人氣,民主黨一定慘輸,公投更加冇意義,擺明就係要谷佢讓位,搞到民主黨中常委急急澄清,話黨內從冇考慮此建議。