妄想特權上市 馬雲唔使諗

阿里巴巴話轉去美國上市，本來「同股不同權」的討論已告一段落，點知港交所行政總裁李小加上周一再翻兜，喺網誌寫文話「同股同權在港一向不是普世真理」，更以港交所做例子，話本身架構已非同股同權，持股百分之六嘅港府可委任大多數董事入局。

有猛人解讀李小加文章，話暫且放開佢是否想為馬雲回歸香港上市引發討論的可能性，文章在資料上本身已引喻失當，皆因港交所本身因為重大公眾利益，才獲得豁免，而在關連交易時，大股東沒有投票權，亦是為了保護小投資者利益。

李小加上周一喺網上翻兜「同股不同權」嘅討論，結果引起巨大迴響，搞到佢周三要補發網誌「補鑊」。

據聞李小加言論引起政府財金官員不滿，即晚要求港交所澄清，李小加都好識做，上周三晚再發網誌「補鑊」，話立論旨在拋磚引玉，激發各方討論，又話引用港府有權委任港交所過半數董事的例子，「也許並非最理想的例子」，因港府的權力來自法律，旨在保護公眾利益。

猛人又講番歷史，話同股不同權曾經在殖民地時代的香港出現過，當時幾家英資公司發行咗A、B股，大股東靠持有B股，用好少資本就可以控制成家公司。

港英政府見係英資公司，就任由它們。不過回歸前情況已改變，英資大行怡和就因為同政府講唔掂數，走去新加坡掛牌。

猛人又話，阿里巴巴要特權，如果美國可以滿足它，就去美國上市；假如阿里巴巴選擇在香港掛牌，就「唔該佢遵守香港規矩」。

據了解，港府喺呢件事上都企得幾硬，馬雲想以特權在香港上市，諗都唔使諗。