特首賽仲有兩年幾至開鑼，但已刀光劍影，暗箭橫飛，邊個出頭就射邊個，且招招有殺傷力。最新例子係田北俊忽然出手「抹紅」梁振英，表面上講北京邊揀特首人選，實則暗「o趙」佢一嘢，都幾狠辣。

事緣上周田少接受某報訪問，開始前閒扯幾句，話自己早前同中聯辦副主任黎桂康遊西藏，暗示「我有堅料㗎！」。轉入正題之後，田少話中央有三件大事要抓，其一就係特首選舉，而他聽到「北京聲音」，指香港已試過商人治港、公務員治港，可以嘗試「幹部治港」，而振英哥正係「幹部治港」嘅代表人物。

田少向來自誇有「天地線」直通阿爺，又同黎桂康扮晒friend，所以今次講「幹部治港」亦講到似層層，看似有料到。一般港人聽到「幹部」兩個字，都會諗係共產黨，因為做到幹部，十個有九個半都入咗黨，田少話振英哥係「幹部治港」，即是指佢已經係黨員啦！

咁樣「抹紅」振英哥，對佢都幾傷，因為香港人對共產黨始終有疑惑，如果振英哥一早已秘密入咗黨，原來係「政治無間道」，咁就更弊，田少唔會唔知港人心理，只要用紅油抹振英哥幾吓，佢就水洗都唔清。

點解田少要咁做？政圈老友分析，田少雖然口口聲聲話無意爭做特首，其實佢始終未死心，政治呢味嘢，一個月已好長，何況仲有兩年幾，中間仲有好多變數，對田少嚟講，機會永遠存在；退一步諗，就算自己唔出，亦可做「造王者」，幫自己屬意嘅人登上寶座，以後就有大把好處。無論邊個諗法，佢都有動機掃低振英哥。

自由黨核心遊西藏，中聯辦副主任黎桂康同行，返港後田少就話「收到北京料」，是否製造假象，冇人知。

五年前「秘聞」冇根據

振英哥無理由睇唔出田少嘅意圖，亦知道被貼上「紅色標籤」會好弊，所以第一時間發出澄清，話自己並非任何政黨嘅黨員。呢種抹紅行動，並非首次，早在五年前，已有周刊引述《文匯報》已故前總編輯金堯如話，梁振英親口承認在學生年代已加入共產黨。當時振英哥已鄭重表明從來冇向任何人表示曾入黨。

振英哥私下同好友講，周刊呢段「八卦料」確係虛無飄渺，佢自己咁多年都冇同金堯如面對面傾過偈，記者憑乜嘢咁寫，佢搔晒頭，而且金老先生去世幾年，已無人證可以稽考。今時今日仲有人炒舊料向佢「抹紅」，對佢好唔公平。

一波未停，一波又起，田少噏完，評論員練乙錚就再發一箭，在專欄中指「梁辦慌忙撇清，梁並趁機重申自己並非『黨員』。對此申明，市民可否當真？」即是說，你咁講啫，市民會唔會信你吖！練老兄如此看振英哥，並不奇怪，因為一直提攜佢嘅該報老闆娘，多年來都深信振英哥係黨員，邏輯係：唔係黨員，點做到咁嘅公職（例如基本法諮委會秘書長）呀！但老闆娘始終係推論而已，從來冇任何真憑實據。

「抹紅」事件只不過係特首跑馬仔漫長過程中嘅小風波，附和者唔單止針對振英哥，亦趁勢散發「阿爺將直接治港」嘅訊息，然後撥起拒共情緒，為年底嘅政改諮詢造勢。至於振英哥，明槍暗箭將會陸續有嚟，小心啲呀！

湯家驊舊怨新仇 誓打沉毓民方案

湯家驊與毓民有舊怨新仇，誓反對社民連嗰套。

社民連拋出「五區議員總辭」方案，泛民班友初時猶疑，其後唔想做衰仔，又話會考慮，但諗諗吓又覺得「笨實」，冇理由自己冒風險，幫社民連抬轎，於是內部又轉向反對，一句講晒：亂立立！最近一次飯盒會，泛民班友就連聲質疑，認為「玩唔過」。

線人話，泛民幾位阿哥阿姐私下都持否定立場，例如梁耀忠，就認為呢招冇用，仲想過開記者會提出反對，最後被其他人㩒住；李卓人更加直言社民連呢套只係玩嘢，辭咗再選番，亦唔算係公投；湯家驊更指泛民在九龍東個勢好弱雞，如果嫻姐企出嚟「一對一」，泛民分分鐘輸埋個位。

阿湯唔單止閂埋門反對，早幾日更寫文去報紙，又接受訪問，話呢招好差，只係美麗幻想，輸嘅嘢好多，贏嘅可能無，蝕本生意無理由去做！擺明唔會跟社民連癲。阿湯完全唔buy毓民同長毛，一來因為雙方早結恩怨，舊年立法會選舉前，毓民爆阿湯秘聞，指佢違背民主原則，呢招搞到公民黨失票甚多，阿湯對班友自然恨之入骨；二來佢睇通社民連想藉此搶政改支大旗，佔據有利戰略位置，咁搞落去，公民黨仲有地企？

另一邊廂，長毛在周日再向泛民施壓，話如果泛民決定太慢，政改主導權就會畀政府搶番，咁泛民就要返屋企瞓覺。佢老哥又在網上電視ourtv發炮猛轟泛民班友騰雞無用，掀起一場「口水戰」。

泛民已定咗九月尾再傾社民連方案，但睇各位阿哥阿姐嘅態度，「五區總辭」成事機會好微。

長毛周日開腔迫泛民接受「五區總辭」方案，搶佔主導地位。

迷債苦主散晒 阿甘湊人頭死撐

銀行提出六成回購建議後，迷債事件急轉直下，線人話苦主已散晒，愈嚟愈多人走去同銀行和解，搞手正陷入苦撐困境。

到上周三，已有九千二百幾人接受回購建議，佔合資格客戶四成，估計好快就會過萬，苦主正「噓噓聲」去簽。線人話，銀行今舖做得好積極，搵職員逐個打電話去游說，好多人已心郁，簽同意書只係時間問題。剩低仲有少數死硬派，佢哋部分人其實都想簽，只不過希望撐多一陣可以博多啲，所以未肯收手。

最慘係靠迷債食胡嘅甘乃威，以及玩到high唔想停嘅搞手陳光譽，惟有大力箍住班死硬苦主，同時拉埋一批ELN及精明債券客戶入隊一齊搞，其實呢批投資者同迷債無關，一定冇得賠，但搞手要湊人數，無計啦。