毓民去美加開騷搞棟篤笑之前，先在香港開演一套「五區總辭」新戲碼，即五個議員齊齊辭職、重選，變相進行公民投票，以示民意要求二○一二年就雙普選。此招一出，立即牽動政圈熱烘烘討論。毓民攞到頭彩，民主黨一哥何俊仁唔想執輸行頭，早幾日突然另開一台新戲，提出如政制方案過唔到，特首應引咎落台，否則就解散立法會，由市民投票重選議員。

線人回報，仁哥急急推出新方案，背後有一個秘而不宣的原因，同過氣主席李柱銘有關。

話說毓民的「五區總辭」登場後，社民連三煞在幕後頻頻出小動作，一方面發動旗下「紅衛兵」在網上討論區及facebook大吹大擂，又挑釁其他泛民黨派，令民主黨及公民黨十分被動，跟又唔想，唔跟又怕被罵衰仔；另一方面，毓民見到泛民內部反對聲音愈來愈大，若然要逼班友接受，一定要找「叔父輩」的泛民老大出馬，於是親自打電話畀李柱銘及司徒華，游說兩大元老支持「五區總辭」。

線人話，毓民同兩人講，共產黨最怕公投，議員辭職再選，乃最佳鬥爭策略，又可引起國際關注，而且重選再贏的機會甚大，風險唔高，博得過。據知馬丁（李之洋名）幾buy毓民呢套，有些少心動，可能在短期內公開表示支持；至於華叔，就仍有保留，不肯明確表態，並「教訓」毓民及社民連唔好再攻擊泛民黨派，造成陣營分裂。

民主黨大佬知道毓民向馬丁埋手，即時閉門共商對策，認為「五區總辭」是自殺方案，對社民連利多於弊，但對泛民兩大黨就好有殺傷力，若重選落敗，便全盤皆落索，失去跟政府就政改討價還價的籌碼，十分大鑊。但如果毓民拉到重量級民主派人物支持，攞咗個勢，泛民兩大黨可能要無奈支持。面對此兩難之局，上策是自己提出一套新方案，搶回主導地位。

火速行動 同毓民鬥快

仁哥於是火速行動，同毓民鬥快，上周匆匆提出逼特首解散立法會的策略，頓時成為傳媒焦點。但佢老哥行得太快，事前未在民主黨黨團（由該黨各立法會議員組成）討論，亦冇交中委通過，連副主席劉慧卿及鄭家富亦蒙在鼓裏，對仁哥咁做唔多高興。

至於公民黨，對毓民咁玩嘢就更加反感，亦認為「五區總辭」絕非上策，可能搞到一鑊泡，內部討論時多數反對。但仁哥的一套方案同樣是險着，因為是否解散立法會的權在煲呔手中，即使政改方案不通過，煲呔大可按○七年全國人大的決定，繼續用現行的方法選舉，不會陷入僵局。政制再次原地踏步，「罪」在泛民，唔關我事。所以泛民賭呢鋪隨時輸清光。

《信報》製造 「赤的疑惑」

華叔飛哥講多錯多

《信報》連續個幾禮拜大做文章指振英哥是共產黨，繼訪問田少放出紅色疑雲後，又搵政圈兩大元老飛哥同華叔，分幾次「指證」振英哥是黨員，此種做法並不尋常，頗令人費解，圈內一個說法指，成件事係由該報副老總游清源搞出，旨在博出位兼幫某方人士製造對振英哥不利的「赤之疑惑」，老總陳景祥及部分編採人員並不認同。

如果消息有真憑實據，大肆報道亦無妨，問題係飛哥與華叔的說法，皆有故弄玄虛成分，而且部分與事實不符，甚至錯到離譜。

該報記者問飛哥，梁振英是否共產黨，佢回答說：「相信他是三千多香港本地共產黨員之一」，根據乜嘢？報道冇講明，但標題就大大個字說：「李鵬飛：梁振英肯定是共產黨員」，十分震撼。振英哥一早睇到報紙，電郵加手機即搵飛哥，多次致電後，終於打通，飛哥回答話自己意思唔係乜，「你話唔係就唔係啦」。

次日記者又搵華叔comment，佢老人家話，梁振英九七前被北京委任為中英土地委員會委員，因此相信佢係共產黨。振英哥睇完段新聞，更加㷫過辣雞，因為佢從來冇做過中英土地委員會委員，一怒之下立即正式寫信畀《信報》老總陳景祥，要求更正澄清。

錯就係錯，冇得拗，故該報登出澄清聲明，承認華叔所引資料有誤。記者搵華叔回應，佢話「可能記錯咗」，但「一個錯處不代表全部都錯」，跟住又指梁振英冇出任過香港公職，一做便做行政會議召集人，如果唔係黨員，點會咁。

但老人家一錯再錯，振英哥立即指出，佢在九七前已做過房委會、市建局、土地及建設諮詢委員會，九七後又入咗行政會議，話佢冇出任過公職，完全與事實不符。

阿涂十二．十四大婚

廣邀各路人馬

踏入十一月，政圈喜事接踵而來，繼曾鈺成於十一月二十一日正式拉埋天窗（本欄早前獨家披露），涂謹申亦定於十二月十四日迎娶公關界阿姐蘇麗芬，屆時將大排筵席，除了民主黨眾兄弟，亦會廣邀各路友好出席，左中右無拘，聞說振英哥亦在派帖名單之上。阿涂年前出現婚變，黯然同太太分手，當時陷入人生最低點，日日愁雲慘霧，其後與蘇麗芬由知交發展為情侶，開始愛情第二春，感情一日千里，早前向芬姐求婚成功，只是沒定佳日。如今時間定出，好快就會廣發喜帖。