世紀官司開打 高官：「純官咪虎頭蛇尾呀！」
鄭家純為原則而戰，不惜重金聘請教父級大狀施偉賢（右圖）上陣，對手是資深大狀麥高義（左圖）。
新世界中國主席鄭家純挑戰立法會「特權」嘅世紀官司，周一揭開戰幔，純官重金聘請教父級大狀施偉賢及英國御用大狀Dinah Rose上陣，對方則搵咗資深大狀麥高義及英國上議院議員Anthony Lester做代表，另外仲有李柱銘（代表「長毛」）同鄧蓮如老公唐明治（代表律政司）加入戰團，可謂粒粒皆巨星，往後戰情必然精采。
純官今次提出就《立法會（權力及特權）條例》進行司法審核，主要打兩點：第一，只有立法會全體議員至有權傳召佢去聆訊，專責委員會冇權咁做；第二，專責委員會要佢提供個人及公司嘅私隱資料，超出咗權限，與法例不符。如果純官贏咗，以後立法會運用特權去調查就要受更大限制，唔可以隨意話召就召，要佢供乜就供乜，等於剝咗立法會幾隻牙，好難再惡晒。官司結果影響深遠，唔怪得各方都擺出強陣出擊。
有人話純官呢鋪大反擊，係為咗拖住聆訊，暫避作供，乃緩兵之計。知情老友指出，實情並非如此，純官打呢次官司，係為原則而戰，因為佢兩次被召去立法會，總共「審」咗十粒鐘，深深感受到議員權力冇限制，咁樣落去，對香港營商環境會有負面影響，所以奮而入稟，希望法庭釐清立法會權限。佢老哥因此不惜搵最強律師班底，誓會一路打落去！
政圈線人話，今次呢場大仗，唔係純官個人嘅事，政府同「阿爺」都極之關注。立法會議員近年屢屢當官員係沙包咁打，且愈打愈惡死粗暴，高官深受其苦，卻只能啞忍，敢怒不敢言，當見到純官毅然出手還擊，官場內自然拍晒手掌，喝采叫好，一位高官更私下同友好講，希望純官唔好畀對方一「兇」就收手，「咪虎頭蛇尾呀！」呢句話係有意傳畀純官聽，用激將法鼓勵佢勇戰到底。
至於北京嗰邊，知情老友話，「阿爺」已注意到近年立法會權力膨脹，都幾憂慮。過往「阿爺」一直採取較溫和態度，希望畀香港自己解決問題，點知反對派貪勝不知輸，在立法會玩到出晒火位，咁搞落去，政府好難施政，隨時搞出個大頭佛，動搖香港穩定，所以「阿爺」對立法會開始轉趨強硬。
今次純官開火，雙方分分鐘打到終審庭，以「阿爺」現時嘅思路，到時有可能出硬招，運用基本法解釋權，定清楚立法會嘅權限，以消除長遠隱憂。須知香港政制正走緊去普選，直選議員必會增加，「阿爺」當然唔想立法會權力無限膨脹啦！
世紀官司序幕，連場好戲啱啱開始，大家擔定櫈仔睇戲啦。
長毛搵李柱銘做代表律師，加入戰團撼一鋪。
自由黨又出慣技 借中聯辦抬高自己
上星期，自由黨核心同第二梯隊人馬共二十幾人，去西藏訪問五日，田少嘅「老朋友」、中聯辦副主任黎桂康同行。據報自由黨利用兩日坐火車時間，在車廂進行密集式「腦震盪會」，討論自由黨點樣重建地區勢力，部署三年後立會選舉捲土重來，攞番失咗嘅議席。
呢次西藏行，有兩件事值得注意：首先，在起程之前，田氏兄弟已高調宣傳，特別透露黎桂康同行，到返港之後，田二少更向傳媒放料，話自由黨同中聯辦關係「好好」，仲話黎桂康向自由黨班友教路，建議佢哋如果想贏立法會選舉，要先做好區議會工作，而在中產地區出選比較有優勢。政圈老友話，此乃「田氏」慣性動作，就係標榜「中聯辦支持我」，然後要其他建制派及政府識做，目的係借中聯辦為自己造勢。
老友指出，佢哋咁做可能令黎桂康好尷尬，因為中聯辦官員不宜公開介入選舉，飲茶灌水時間閒談幾句無所謂，但唔可以出街，今次田二少一個唔該將大家傾閒偈嘅內容透露出街，既會引起無謂議論，又令黎桂康麻煩，可以話「陷佢於不義」。田氏兄弟以為今次可以借中聯辦抬高自己，結果可能弄巧反拙。
至於自由黨沿途傾過乜嘢「秘密策略」，線人報料說，剛返回黨核心嘅田大少，雖然自己冇講再戰江湖，但就有嫡系人馬識做，建議佢出山，兩年後在新界東掛帥參選，重奪議席，理由係該區泛民陣營立立亂，有機會一博。
田少與自由黨核心二十幾人去西藏，中聯辦副主任黎桂康同行（中）。田氏兄弟對此高調宣傳，咁做唔多正常。
鬍鬚曾打穩陣波 唔敢睇好經濟
香港經濟第二季出現反彈，終於見番少少陽光，但官場老友話，鬍鬚曾並未「開心晒」，認為經濟前景仍然唔明朗，原因係歐洲經濟仲好差，比美國更加大鑊，唔少大企業被美國爆煲拖累，問題逐漸顯現，極唔靚仔；另外，美國金融風暴仍有可能爆第二波，雖然冇第一波咁猛，但仲有殺傷力。
據政府內部分析，因為以上原因，外圍出口市場唔係咁好，短單雖多番啲，但大量年尾定單未到，就算有都去咗大廠，中小企仍然辛苦，所以失業率分分鐘會飆一飆。
官場老友話，煲呔十月份施政報告，亦唔會對經濟過份樂觀，將繼續撐住中小企，並推動六大產業及基建，以創造就業，不過唔會再派糖啦！
事實上，第二季GDP好轉，主要係因為政府泵水，如果無咗阿公頂住，經濟仍難免衰退。
