今次嘅嘉賓，唔使我多介紹，陳貝兒（Janis），喺擔任娛樂新聞主播6年間，閱盡世界型男：木村拓哉、里安納度狄卡比奧、畢彼特、佐治古尼等等，全部都成為過Janis嘅訪問對象。我要介紹嘅，係Janis嘅新身份——bma市場推廣部副總裁。除咗為公司推廣出版同足球隊之外，Janis仍然兼任「藝人」身份，相信你哋都睇過佢早排擔任「香港先生」司儀嘅表現啦！

改變每每需要無比勇氣，Janis為事業踏出咁有勇氣嘅一步，我梗係要請佢品嘗一吓特色嘅廣東菜式啦！

飯局金句：Never say never！

Janis喺「港男」拍住Do姐都咁淡定，證明佢投資6年嘅「主播事業」並冇白費，難得今晚佢擔任我嘅飯局嘉賓，點都要乾杯！

雖然Janis一向予人較成熟嘅感覺，但係佢真人其實好活潑，連影相佢都揸住隻龍蝦做道具，哈哈哈！

雙重身份反逆市

金融海嘯下，各行各業都要縮皮度時艱，以不變應萬變，Janis偏偏喺呢個時候選擇轉變，離開從事咗6年嘅有線娛樂新聞主播行列，投身bma，成為行政人員。

「我覺得自己好好彩，能夠喺逆市之下有兩個job offers，一個喺市場推廣部工作，另一個就係喺TVB發展主持工作。其實我自己對舊工作都仍然有一股熱誠，不過我係一個典型嘅雙子座，鍾意面對變化同挑戰，既然依家有一個咁好嘅機會喺我面前，我都想試吓新嘅工作，學多啲嘢裝備自己。」

哈哈哈！雖然我對星座冇乜研究，但係我好欣賞Janis挑戰自己嘅膽識，所以今晚我就請佢嚟「漁香小菜皇」，試吓一啲新式嘅廣東菜式，啱晒佢咁鍾意試新嘢嘅性格！

正當我想問吓Janis對新工作嘅目標之際，侍應就先遞上「漁喜」嘅即食叉燒皇畀我送酒，哈哈哈！好！咁我就可以同Janis飲住慢慢傾！

「之前做娛樂新聞主播，累積咗6年嘅主持經驗，喺TVB就正好畀我再發揮喺呢方面嘅能力，而且能夠加入TVB，我有機會學到大機構嘅制度外，仲可以即刻同Do姐（鄭裕玲）合作主持『港男』，你知啦，Do姐做事認真，做主持可以做到控制現場氣氛，壓得住場，係一個好好嘅學習對象。

「喺TVB，不論大show細show，其實有得畀我做就已經好好，除咗主持綜藝節目之外，我好想試吓做一啲資訊性強嘅節目，好似《向世界出發》咁，畀我作多方面嘗試。」

雀躍投身OL界

當晚我揀咗一味堂弄芹香斑球（$198），咁我自然要為Janis炮製斑球啦，手勢OK㗎！

為Janis炮製過後，我忍唔住手都要即刻試吓個斑球！

對於擔任司儀、主持，我對Janis絕對有信心，反而對佢參與市場推廣工作一環更有興趣，唔講唔知，Janis平時好少飲酒，但係嚟得「金牌飯局」做嘉賓，佢都畀足面呷一口，我？我梗係乾啦！

「我細個嘅時候已經憧憬過大個可以着套裝做行政人員，依家可以夢想成真，真係要多謝老闆同老闆娘嘅賞識。我一返工就可以參與到書展同南華對熱刺嘅盛事，對我依家負責出版部marketing同Sports department嚟講，都係不可多得嘅經驗。

「以前足球對我嚟講，只係4年一次嘅事，即係到世界盃舉行嘅時候，我先至會睇波，但係依家要兼顧埋球隊嘅推廣，我要掌握埋球壇脈搏，對我嚟講都係新鮮事。

「不過，做行政人員最大、最寶貴嘅得益，我覺得係自己終於可以同普通OL、普通人一樣，可以作息定時，可以喺星期日或者公眾假期嘅時候放假。以前做主播，我連見屋企人嘅時間都好少，依家可以每個星期都同爹哋媽咪飲茶，可能因為我係潮州人啦，我覺得家庭對我係最重要㗎。」

3S規條揀男友

為慶祝Janis事業嘅新發展，我不停同佢暢飲，一向少飲酒嘅佢，非常畀面咁同我輕嘗威士忌，thank you！

雖然Janis一向畀大家一種獨立、事業型新女性嘅感覺，但係我話你知，骨子裏嘅佢係一名傳統女子，就算佢依家仍然係單身貴族，其實Janis對揀男友係自有一套準則。

「我當然想搵一個關心我嘅男朋友，依家事業有新嘅發展，有唔少朋友都同我講，我喺另一個範疇工作，會搵到更好嘅另一半。其實我對揀男友嘅要求好簡單，只係3個S——smart、successful同埋single已經OK，好似George Clooney（佐治古尼）咁，佢就符合晒以上條件。

「不過，感情事好難講，你揀人，人哋亦都揀你，所有嘢都好講緣份，老套啲講，一切隨緣。」

好！今晚我同Janis有緣相聚，我祝佢事業愛情兩得意，如佢所說，一切隨緣！

漁喜小菜皇