大家知道我進軍電影界，適逢港產片喺今年暑假黃金檔期復甦，上期我同《機器俠》一班手足嚟咗個開心飯局，今期，就攞正牌laughing！唔係搞爛gag，今次我請咗「Laughing哥」謝天華，同佢喺《Laughing Gor之变節》嘅女友陳法拉（Fala）做嘉賓，真係攞正牌㗎！

「Laughing熱」再次鋪天蓋地湧住嚟，上周四（13日）開畫首日票房就高開106萬，旗開得勝；我要帶「Laughing哥」去香港名牌農圃飯店試吓最合時令嘅夏日菜式慶祝，一樣咁啱timing！

飯局金句：旗開得勝！

Summer．消暑頭盤

天華啱啱返港，法拉就匆匆趕嚟「金牌飯局」，兩位咁賞面，我點會唔高興？

炎炎夏日，每日嘅最高氣溫都高達30幾度，就算「Laughing哥」近排熱到辣手，我都要帶謝天華食吓啲消暑菜，尤其佢呢排為咗新戲《精舞門2》，要香港、青島兩邊走，更加要食啲好嘢補番數！

天華一到埗就同我講：「Paco你約呢個飯局，啲時間真係夾得啱啱好，我頭先至由青島落番嚟，好彩嚟農圃，唔係我都未必嚟到。」事關天華家住港島，我梗係計劃好先至請嘉賓啦！閒話休提，天華一到自然要請佢講吓佢喺《Laughing Gor之变節》，咪住，乾咗我帶嚟嘅Glenlivet 18年單一純威士忌先講，乾！

「其實電影係之前《學警狙擊》嘅延續，雖然部戲係Laughing嘅前傳，但係喺演繹上我都係做番一個寸寸哋嘅Laughing，只係多咗年少氣盛嗰團火啫。

「而且之前喺《煞科》已經同Herman（導演邱禮濤）合作過，我諗佢比我哋開一部戲辛苦好多，因為拍《Laughing Gor》嗰時，佢手頭上仲有另一部戲。不過，咁樣佢仲可以lead住我哋成班演員，我記得有場戲講鎮宇爆我樽，一爆，連我耳仔都標埋血，我右耳直情耳鳴，Herman即刻停機走埋嚟問我：『你有冇事呀？流緊血喎！』哈，我嗰時隻耳仔有啲痛啫，但場戲未拍完，我自然頂硬上啦！好彩跟住一take過就搞掂；我拍檔法拉第一次拍電影，OK喎佢，冇乜怯場，拍我同佢逃亡嗰場戲，我feel到法拉入晒戲添，新人嚟講 ，佢嘅表現達標有凸。」

呢頭一講法拉，女主角就到場嘞！頭盤啱啱上，我先請兩位嘉賓「趁凍」試吓味冰鎮瀨尿蝦先！

0

Fala．度假驚魂

酒逢知己，天華同我杯杯乾，可惜法拉對酒精敏感，歎唔到我專程帶嚟嘅美酒。

夏日悶熱令人食慾驟降，呢味梅子醬豆腐蒸中蝦就最啱用嚟開胃，中蝦鮮美，配合梅子醬「酸味味」，令法拉都食指大動。

法拉一講到夏威夷大戰海魚嘅「戰績」，比劃過魚嘅體積，就分享佢嘅「奮戰疤痕」（右圖）。

天華對法拉表現讚不絕口，唔使我多sell，相信你哋可能已經睇咗《Laughing Gor》啦！部戲不論優先場抑或首映都場面墟冚，你估法拉又點睇？

「未見到觀眾嘅反應，我都會有啲緊張嘅。好似第一日開工，我去到個set。見到所有嘢同拍劇嘅嘢好唔同，都要用啲時間去適應，好彩Herman好nice，我初初見到佢以為好惡，會鬧人嗰隻，但係其實佢好爸爸，好有耐性教我做戲。

「另外，因為鎮宇飾演我哥哥，所以我同佢最多對手戲，佢都會教我點樣去handle個角色，真係學咗好多嘢。」

一面講《Laughing Gor》，我哋就食到一味鹽煎活東星斑，見到呢道新式煮法嘅海鮮，法拉就講到佢啱啱去夏威夷度假嘅潛水意外。

「我同爹哋、媽咪出咗啲island，玩潛水，雖然嗰度有notice叫我哋唔好餵魚，但係我見到啲魚糧只係賣一蚊美金，於是貪玩買咗一條落水，點知餵完之後，有條魚以為我隻手指公係魚糧，一啖咬落去，仲要其他人幫手先掹得走條魚，跟住我要即刻上水止血呀！」

哈哈哈！我見到法拉嘅拇指仲留有「戰績」㗎！

Luxury．抵食珍饈

話咗飯腳係飯局嘅最重要一環，你睇吓我今晚兩位飯腳嘅燦爛笑容，一定感受到我哋呢晚嘅喜悅！

天華呢排一面為《Laughing Gor》宣傳，一面要兼顧青島《精舞門2》嘅拍攝，喺戲中大跳hip hop同拉丁舞蹈，食番啲好嘢補吓啦！

睇完靚女「戰績」，我梗係要請佢一嘗名貴美食，侍應適時端上四十八頭日本皇冠吉品節瓜環配鰵膠北菇，補充一吓先！

天華話：「其實我今年生日都同屋企人嚟咗農圃食飯，你今晚又係同我嚟呢度飯局，真係啱！」哈哈哈！我都話我每次都為嘉賓精心挑選飯局地點啦，食飯嘅菜式固然重要，但最緊要係同邊個食，即係飯腳係邊位呀，天華好明顯係我嘅「金牌飯腳」啦，嚟！乾！

咁開心，我今晚要向識酒之人天華懺悔一吓，流行多年嘅威士忌溝綠茶嘅飲法，係我以前帶動嘅，但其實咁樣反而會破壞晒威士忌本身嘅味道，實為大罪也！各位，要真正品嘗威士忌原味，尤其係靚嘅威士忌，只需要加冰就已經足夠，溝綠茶真係好嘥料！

天華聽到立即點頭認同，佢仲話：「歎靚酒，保持佢嘅原味好緊要，而且酒後真係唔好揸車，我依家停緊牌，所以拍《Laughing Gor》嗰陣，我可以由大廈A天台跳去大廈B天台，但係好遺憾，飛車嘅鏡頭就要靠特技人員代拍，我連揸車嘅大頭鏡頭都要靠拖車拖住我揸架車嚟拍。」

哈哈哈！聽到佢咁講，就知天華大個仔成熟咗啦！好！乾！