主頁 > 專欄 > Paco巨星飯堂 > 師兄本色 2018 年 01 月 21 日

黃栢高

黃栢高(Paco)，金牌經理人，叱吒樂壇三十年，炮製無數金曲，捧紅不少歌手。近年涉足電影，《行運超人》、《龍咁威》、《殺破狼》等，皆叫好叫座。最新動作，除於本刊主持《Paco巨星飯堂》，每逢周一更在《頭條日報》主持「名人會」專欄，專訪城中名人、紅星。

師兄本色

二〇一八年只係過咗半個月，你為今年定下計劃未呢？正在實行中？咁就啱嘞！今次「Paco巨星飯堂」嘅嘉賓師兄劉浩龍，喺一八年有各項事業大計，o依家都係一一實行中，向觀眾展示真正本色！

我帶師兄去到位於銅鑼灣嘅「紫」，品嘗特色嘅日本fusion料理，詳談佢新一年嘅各項計劃外，再公開我哋一段「白子奇緣」。

一八年剛開始，師兄已經滿肚密圈，準備喺歌、影界中大展拳腳。

白子之緣

今次飯敍嘅餐廳供應白子天婦羅，加上嘉賓師兄，就令我回想起去年嘅銀座。師兄大表贊同：「我一向都好嚮往日本嘅美食，加埋shopping嗰啲，所以好鍾意去當地旅行。舊年我同Paco你，同一時間分別去東京旅行，你搵我嘅時候，我哋又咁啱都係喺銀座，就咁促成咗一個即興lunch飯局。

「銀座嗰間餐廳，又有serve白子天婦羅，不論菜式味道定係佐酒適合度，都係最top嘅享受，我食咗嗰餐之後，晏晝就已經浮吓浮吓咁走，因為飲咗好多sake！」

哈哈哈！白子係我嘅favourite，喺度為你哋解說一下。白子係魚類嘅精巢，亦係日本人嘅冬日補身良品，食材含豐富蛋白質、維他命D等，大有滋陰養顏之效。而當中質素最好又最受人追捧的，一定係鱈魚白子。

而鱈魚白子喺每年十月尾至翌年三月最肥美，有說一條鱈魚可擁有五百至一千克白子，都幾矜貴。有人可能覺得食白子感覺噁心，但其實白子質感柔滑豐腴，一啲腥味都冇o架。

我帶師兄去到位於銅鑼灣嘅「紫」，品嘗特色嘅日本fusion料理，細說佢喺新一年嘅大計。

去年我喺東京銀座巧遇師兄，仲同佢喺當地品嘗白子天婦羅，今次飯敍再重溫「舊菜」。

今次我哋所品嘗嘅紫會席料理（$880加10%服務費），共有六道菜式。呢道魚子醬日式溫泉蛋，用日本長崎雞蛋製作，蛋白嘅口感滑嫩如豆花，蛋黃軟溜半熟，再加入法國奧賽佳魚子醬及金箔，唔使外加額外調味料，真正品嘗到材料嘅鮮味。

呢個咁富有色彩嘅冬季搭配，用上新鮮有機蔬菜，包括羽衣甘藍、菠菜、火箭菜及世界上最細嘅迷你番茄仔，配上以羅勒、松子仁、芝士及醋製成嘅自家製紫蘇香草汁，更覺開胃。

套餐另加$148，就可品嘗精心炮製嘅龍蝦湯。

不時不食，o依家正值係鱈魚白子嘅當造期，餐廳仲供應白子天婦羅，令我同師兄可以藉菜式回味往事。

再遇丹爺

講到事業，師兄去年跟王晶、甄子丹、劉德華合作電影《追龍》後，今年將會再跟前兩者合作，「詳細嘅內容未可以公開住，但係同晶哥、丹爺合作，對我呢個影壇新人嚟講，一定係獲益良多嘅！丹爺就唔使講啦！佢忙到咁都要搵專家學潮州話；最令我大開眼界係，佢睇一次武術指導嘅動作，已經可以100%打番出嚟，而且仲係升級版本，出嚟嘅效果仲靚，學都未必學得到！

「晶哥就犀利嘞！佢會喺拍攝空檔時間，同我哋分享佢嘅故事，我諗都諗唔到，原來佢讀中學嘅時候，係學校籃球隊嘅中堅份子，仲有好多有趣嘅故事。」

喺再同兩大巨頭合作之前，師兄喺電影《臥底巨星》中，先飾演元豹「豹家班」動作指導，一口港式普通話充滿喜劇感，唔少網友仲捧佢為為新晉喜劇笑星。「拍攝嗰陣，因為我嘅普通話麻麻哋，同工作人員鬧過啲笑話。之前宣傳時，仲俾李榮浩笑，但係好玩嘅，肥谷導演（谷德昭）仲封我做劇組嘅普通話反面教材。」

佢仲話，導演要求佢唔打得但要睇得，拍攝時要露麒麟臂，於是佢就用兩個月減咗廿一磅。