騎劫「港視」集會 社運圈內訌

免費電視牌照風波燒大，周日大批市民上街包圍政總聲援港視，唔少政黨團體都請纓幫手，聲勢浩大。不過，幾個搞手因內部溝通混亂，最終搞到擘面收場。

話說上星期二政府宣布唔發牌畀港視，「左翼廿一」兼港大左翼成員陳璟茵即時喺網上發起「萬人齊撐﹗」群組，一日內已經有三十萬個支持者。陳璟茵同另一「左翼廿一」成員區諾軒見勢頭唔錯，決定聯絡港視藝員、導演代表，但另一邊廂公民黨毛孟靜又搶閘同港視工會商討，又申請埋政總廣場做集會，一時間大家同時喺度搶嘢做，各路人馬要到大集會前一日先坐埋一齊協調，決定星期日行動流程。

「港視」集會變社運內訌，「龍獅旗」成員（上圖白衫）衝上台抗議陳璟茵（下圖）騎劫集會。（張恩偉攝）

由於時間緊迫，溝通又好亂龍，周日政總集會當晚，區諾軒同陳璟茵等人，突然又自行商討下一步點做，搞到好多港視員工矇查查，覺得單純的發牌抗爭，被班社運友搞到好似「佔中」預演，而現場有幾個舉龍獅旗的本土派人士又即場撥火，既揮舞龍獅旗、又上台搶咪，批評左翼廿一騎劫港視集會，搞到台上亂晒龍，台下亦大鼓譟。

搞手之一的區諾軒同本刊講，港視員工事後冇再同佢哋聯絡，估計唔想社運友再插手；區諾軒又話，今次事件令佢本人有點心灰，覺得社運圈內一班人咁爭法好無意義，佢已喺facebook話會淡出社運圈。