台獨教父介入 「佔中」玩火恐失控
上星期，政府拍板政改諮詢年底去馬，搞咗成大半年都冇乜大進展的「佔領中環」行動，亦即時出新招。
「佔中」發起人之一的朱耀明牧師與真普聯召集人鄭宇碩、工黨主席李卓人上周六專程飛去台灣拜會前民進黨主席、台獨元老之一的施明德，向對方請教搞革命的看家本領，施明德亦好似幕後總指揮咁教路，話明年係香港回歸十七周年，可以由明年初開始，每日推十七個死士出來被人拉，一直將聲勢推到七月「佔中決戰日」為止。
「佔中」搞咗大半年，好多細節都未諗得掂，但施明德一出口就講到具體戰略，仲叫人「博拉」，有反客為主的意味。有政圈人士就擔心，今次朱牧、鄭宇碩等兵行險着，引入台獨外援，究竟有冇能力駕馭佢哋？據講連泛民內部亦覺得憂慮。有泛民線人透露，同「台獨」搞埋一堆，「佔中」隨時被呢班「台獨幫」騎劫，搞亂檔攤。
紅衫軍總指揮施明德明年真的來港，隨時將「佔中」變成「港獨」運動，到時相信戴耀廷（小圖右）亦無力控制。
真普選線人向本刊透露，泛民以往同施明德、民進黨等人間中有來往，但主要都係就民主發展作學術交流。記者八到真普聯在上周三特別召開內部會議討論這次台灣之行，會上有人解釋，只係一般聯絡，當時除了工黨李卓人最積極外，好多人都有保留，最後經大家投票，否決以真普聯名義派人去台灣。不過，最終鄭宇碩跟埋李卓人、朱牧起行，引起內部不滿，因為鄭始終係真普聯召集人，佢又冇澄清係以個人身份去，好易引人誤會。
部分泛民對施明德頗有戒心，皆因施明德係「台獨教父」，呢幾年不時就香港問題說三道四，又用「中國殖民地」形容回歸後的香港，又呼籲香港要結束殖民地命運，講白啲即係叫香港獨立，言論高度惹火。
施明德幾年前雖因發起紅衫軍倒扁行動而退出民進黨，但佢「深綠」色彩從來冇變，令泛民憂慮的是，施明德一夥當年靠暴力抗爭起家，搞流血革命當食生菜，台灣歷史上有名的「美麗島事件」，出現唔少衝突流血場面，這條「血路」正係由施明德同民進黨班元老殺出來。本地反對派向呢班人埋堆，將本土爭普選運動與台獨運動合流，以為爭取更多彈藥，絕對是玩火行為，只會增添阿爺疑慮，在政制問題上愈收愈緊。
